Биыл Республикада 200-ден астам түлек аудандық, ауылдық деңгейдегі төменгі және басшылық емес лауазымдарға конкурстық іріктеусіз қабылданса, оның 25-ке жуығы Түркістан облысына тиесілі.
Олар, Ветеринариялық бақылау және қадағалау комитетінің Түркістан облысы бойынша аумақтық инспекциясы, Санитариялық-эпидемиолгиялық бақылау комитетінің Түркістан облысы бойынша департаменті, Сауран ауданының білім бөлімі, Бәйдібек, Түлкібас, Ордабасы, Сауран, Сайрам, Отырар, Қазығұрт, Төлеби, Жетісай, Келес, Мақтаарал аудандары мен Кентау қаласындағы жергілікті атқарушы органдардың төменгі мемлекеттік әкімшілік лауазымдарына қабылданды.
Мемлекеттік қызметшілер – мемлекеттік саясатты қалтқысыз жүзеге асыратын, мемлекет және халық тарапынан сенім білдірілген, заңмен үлкен жауапкершілік артылған тұлғалар. Сондықтан да әрбір мемлекеттік қызметші мінсіз қызметімен, жұмысындағы жақсы көрсеткіштерімен көрінуі тиіс. Өйткені, мемлекеттік қызметші жай қызметкер емес, ол – қоғам мен билік арасындағы алтын көпір, оның басты ұстанымы – өз қамы емес, елдің қамы, мемлекет мүддесі, өзі қызмет атқаратын мекемесінің абыройы болуы қажет. Мемлекеттік қызметтің мәртебелі міндет екенін әр мемлекеттік қызметші көкейінде ұстаған абзал.
Осы орайда мемлекеттік қызметке жалынды, біліктілігі жоғары, жауапкершілігі мол, ел игілігі жолында қызмет жасаудан аянбайтын жастар керек.
«Мемлекет басшысы биылғы жолдауында мемлекеттік қызметшілердің біліктілігін арттыру мәселесінің әлі де өзектілігін, үміткерді кызметке тағайындаған кезде оның кәсіби және моральдық қасиеттерін мұқият ескеру қажеттігін айтты. Бұл мемлекеттік қызметшілердің білімін ұштап, құзыреттерін үнемі жетілдірудің және басқарудың жоғары мәдениетін игерудің қашанда маңызды екенін көрсетеді», — деді Мемлекеттік қызмет істері агенттігінің төрағасы Дархан Жазықбай.
Иә, қашанда әділдік, ашықтық қағидаттарын ұстанудың, мемлекетшіл болудың және халыққа адал қызмет етудің маңызы зор.
Жақында Жетісай ауданы Қарақай ауылдық округінің Сәтпаев елді мекенінің мәдениет және спорт кешенінде өткен «25 қазан – Республика күні» Ұлттық мерекесіне арналған салтанатты іс-шарада мемлекеттік қызметке алғаш кірген мемлекеттік әкімшілік қызметшілердің ант қабылдау рәсімі өтті.
Мемлекеттік қызметке алғаш кірген мемлекеттік әкімшілік қызметшілер Жылы су ауылдық округі әкімі аппаратының мәдениет және әлеуметтік саласы бойынша бас маманы Мұсан Сымбат Ержанқызы (ҚР 2015 жылғы 23 қарашадағы «Қазақстан Республикасының Мемекеттік қызмет туралы» Заңының 15-бабы 6-тармағына сәйкес, мемлекеттік қызметке конкурссыз орналасқан) және ауданның кәсіпкерлік бөлімінің бас маманы Жаңбырбай Ақжол Аманжолұлы Қазақстан Республикасы халқының игілігі үшін адал және кәсіби қызмет етуге ант берді.
Сондай-ақ, Келес ауданында да ант қабылдау және мемлекеттік қызметшілерді марапаттау рәсімі өтті. Іс-шарада аудан әкімінің орынбасары Сариев Даурен Нурланұлы мемлекеттік қызметке алғаш рет кірген мемлекеттік қызметшілерін құттықтап, еліміздің даму жолындағы еңбектеріне табыс тіледі.
«Ант қабылдау арқылы сіз халыққа қызмет етуге және мемлекетіміздің мүддесін қорғауға бағытталған маңызды міндеттерді қабылдайсыз. Сіздер маңызы зор мемлекеттік органдардың біріне қызметке тұрдыңыз, жергілікті атқарушы орган мемлекет дамуында шешуші рөл атқарады. Мемлекеттік басқарудың ашықтығы мен тиімділігін қамтамасыз етуге, халықтың тұрақты дамуына және өмір сүру сапасын жақсартуға көмектеседі. Сіздерге қызметтің табысты болуын тілеймін,» — деді Даурен Нұрланұлы.
Мемлекеттік қызмет істері агенттігінің Төрағасы Д. Жазықбай Түркістан қаласында өткен Әдеп жөніндегі уәкілдердің республикалық форумында «Антқа адалдықтың терең мазмұнын ұмытпау қажет. Әрбір мемлекеттік қызметші ант қабылданғанда адал әділ және өз міндеттерін мінсіз орындауға уәде береді. Ант қоғамға адал қызмет ету, ел мүддесін қорғау және жоғары моральдық құндылыққа сәйкес әрекет ету міндетін жүктейді» — деп атап өткен болатын.
Салтанатты шара соңында мемлекеттік қызметшілерге алғыс хаттар табысталды. Ал ант қабылдаған қызметшілер өздеріне артылған үмітті ақтауға, берген сертке берік болатындарын жеткізді.
Сондай-ақ, Шардара ауданы әкімі аппаратының қызметкерлерінің қатысуымен мемлекеттік қызметке алғаш кірген аудандық экономика және қаржы бөлімінің бас маманы Д.Сағынбек, аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің бас маманы М.Акбар және Шардара қаласы әкімі аппаратының бас маманы Е.Құрманбек ант қабылдады.
Аудан әкімі аппаратының басшысы Ж.Бердешов мемлекеттік қызметке жаңадан кірген жас мамандардың міндеттемелері бойынша сөз қозғап, жұмыстарына сәттілік тіледі.
Мақтаарал ауданы Достық ауылдық округі әкімі аппаратының бас маман-салық агенті Маңғыстауова Айгерім Халбайқызы және Жаңажол ауылдық округі әкімі аппаратының бас маман-жер инспекторы Сәбденов Хамит Берікұлы да ант беру рәсіміне қатысып, жұмысқа жаңадан кірген жас мемлекеттік қызметшілер отанға, еліне және қызметіне деген адалдығын білдірді.
Жас мемлекеттік қызметшілер ел мен мемлекет алдындағы үлкен жауапкершілікті сезінетіндерін, Президенттің сарабдал саясатын іске асыру барысында адал еңбегі мен терең білімі ғана сәттілік кілті болатындығын, елге адал қызмет етуге, кәсіби қызметіне күш-жігерін аямай жұмсауға, білімі мен тәжірибесін ұштастыруға ант берді.
Созақ аудан әкімі аппаратында да мемлекеттік қызметке жаңадан қабылданған қызметшінің салтанатты ант беру рәсімі өтті.
Жиын барысында аудан әкімінің орынбасары Ақәділ Сатыбалды жас мемлекеттік қызметшілердің ант беруінің маңыздылығын, халық пен мемлекет алдындағы жауапкершілікті, сондай-ақ мемлекеттік қызметшілердің өз міндеттеріне адал қарау қажеттілігін атап өтті.
Антты аудан әкімдігінің құрылыс, сәулет және қала құрылысы бөлімінің бас маманы, сынақ мерзімінен сәтті өткен Данияр Абубәкірұлы қабылдады. Ол Қазақстан халқына адал және кәсіби қызмет етуге, Конституция мен елдің заңнамасын сақтауға ант берді.
Өз кезегінде аудан әкімінің орынбасары Ақәділ Болатұлы жас мемлекеттік қызметшілерге қызмет барысында адалдықтан таймау, азаматтармен қарым-қатынаста мемлекеттік қызмет әдебін сақтау және сапалы қызмет көрсете білу қажеттігін айтты. Сонымен қатар, мемлекеттік қызметшілерді Ұлттық мерекемен құттықтап, жылы лебізін білдірді.
Фото: egemen.kz
