Үйлестіру кеңесіне облыстық “Жастар ресурстық орталығы” КММ-нің басшысы Ернар Нұралыұлы, облыстық “Жастар ресурстық орталығы” КММ-нің басшы орынбасары Пердебек Сержанұлы және аудан, қалалық жастар ресурстық орталығының басшылары мен облыстық бөлім басшылары қатысты.
Жиында «Талдау, мониторинг және әлеуметтік зерттеулер» бөлімінің басшысы Мейірбек Дінмұхаммед жұмыстардың көрсеткіштері мен бөлімнің атқаратын негізгі міндеттері мен орындалу деңгейін атап өтті. Ал «Жастарға қызмет көрсету және NEET санатындағы жастармен жұмыс жүргізу» бөлімінің басшысы Дінислам Бимахамбет “Алғашқы жұмыс орны”, “Жастар практикасы”, Қоғамдық жұмыстар, “Жасыл ел” жастар еңбек жасағы, “Серпін — 2050” т.б мемлекеттік бағдарламалар туралы ақпараттандыру, олардың мүмкіндіктері мен артықшылықтарын түсіндіру бойынша атқарылған жұмыстарды және NEET жастарымен жұмыс жүргізу нәтижелері туралы баяндама жасады.
«Талантты жастарды қолдау» бөлімінің басшысы Бағлан Бердібек талантты жастарды қолдауға арналған бағдарламалар мен биылғы жылғы жүзеге асырылғанын жобалар жайында баяндады. Ол өнер, ғылым, спорт және басқа да салалардағы жас дарындарды қолдау бағытындағы атқарылған іс-шараларға тоқталды.
«Қоғамдық даму және психологиялық көмек көрсету» бөлім басшысы Кипчакбаева Гүлнұр психологиялық көмек көрсету үшін атқарылған негізгі шараларды атап өтіп, оның жетістіктер мен кемшіліктерді талдады. Сондай-ақ жастар арасында құқықбұзушылықтың алдын алу мақсатында апта сайын түнгі рейдтік шаралар туралы айтты.
“БАҚ және қоғаммен байланыс» бөлімінің басшысы Қайрат Ақтөре аудан, қалалардың әлеуметтік желідегі белсенділікті жоғарылату жөнінде жұмыс жүргізілу керектігін жеткізді.
Кеңес барысында Ернар Нұралыұлы аудан, қала жастар ресурстық орталықтарының басшыларының бюджеттік қаржыларды тиімді жұмсау мәселесін көтерді. Өткізілетін шараларға бөлінген қаржының мақсатты пайдаланылуын қадағалау және осы қаржыға қандай іс-шаралар ұйымдастырылғаны туралы есеп беру тапсырылды. Және NEET санатындағы жастарды жұмыспен қамту, білім беру және әлеуметтік қолдау бағытында жұмыстарды күшейту керектігін тапсырды. Сонымен қоса “Жасыл ел” бағдарламасы бойынша да ұсыныстар айтып, жастарды экологиялық жобаларға тартуды, табиғат қорғауға байланысты шараларды өткізу қажеттігін атап өтті. “Бұл жастардың қоғамдағы жауапкершілігін арттыруға және табиғатты қорғау мәдениетін қалыптастыруға бағытталған бастама” — деді.
Сонымен қатар кеңес барысында аудан, қалалық жастар орталығының басшыларына жастармен жұмыс жүргізу, өңірдегі жастар саясатын жетілдіру мақсатында нақты тапсырмалар мен ұсыныстар айтылып, осы жұмыстарды үйлестіру мақсатында қаржы және ресурстарды тиімді бөлу, жаңа бағдарламаларды іске қосу мәселелері талқыланды.
Сондай-ақ, Түркістан облысы қоғамдық даму басқармасы “Жастар ресурстық орталығы” КММ-нің ұйымдастыруымен “BASTAU TALKS” қоғамдық лекциясы аясында актриса, жүргізуші, блогер Жазира Еркін мен актёр, жүргізуші, блогер Исраил Даулет, сонымен қатар ақын, журналист, Республикалық, аймақтық жыр мүшайраларының жүлдегері, «Дүниеге келер әлі талай Қасым» мүшайрасының жеңімпазы Бауыржан Ерман «Достық үйі» ғимаратында жастармен кездесті.
Кездесу мақсаты — өздерінің өмірлік және кәсіби тәжірибелерімен бөлісу арқылы жастарды ынталандыру, шығармашылыққа шабыт беру және болашаққа деген сенімдерін нығайту.
Жазира Еркін шығармашылық жолындағы алғашқы қадамдары, актерлік өнердегі қиындықтар мен жеңістер, блогерліктің қазіргі қоғамдағы рөлі туралы баяндап, жастарға әрдайым ізденісте болуды ұсынды. Ол өз тәжірибесінде кездескен қиындықтарды жеңудің маңызын атап өтіп, әр жетістікке табандылық пен еңбек арқылы жетуге болатынын айтты.
Исраил Даулет журналистика және медиа саласында жұмыс істеу тәжірибесімен бөлісіп, әртүрлі жобалардағы белсенділігі, актерлік шеберлікті дамытудағы қадамдары туралы сөз қозғады. Ол жастарды өз мақсаттарын айқындап, сеніммен әрекет етуге шақырып, медиа мен өнер саласындағы мүмкіндіктердің кеңдігін атап өтті.
Бауыржан Ерман шығармашылық шабыт пен ақындық өнердің қоғамдағы рөлі туралы әңгімеледі. Ол өлең жазудың ішкі түйсікті дамытуға әсері туралы айтып, өзінің ақындық жолындағы жетістіктері мен кездескен қиындықтары жөнінде ой бөлісті. Сонымен қатар, жастарға қазақ әдебиетіне қызығушылық танытып, ұлттық мәдениетті бағалауға және дамытуға шақырды.
Жиында Түркістан облысы қоғамдық даму басқармасы “Жастар ресурстық орталығы” КММ-нің “БАҚ пен қоғаммен байланыс” бөлімінің басшысы Қайрат Ақтөре Мейіржанұлы модераторлық етті.
“BASTAU TALKS” қоғамдық лекциясы – жастар үшін ерекше мүмкіндік. Бұл жоба әр түрлі салада жетістікке жеткен кәсіби мамандарды, талантты жастарды және белсенді қоғам қайраткерлерін жинап, жастардың білім мен тәжірибе алмасуына мүмкіндік жасау. Олардың өмірлік тәжірибесі мен жетістікке жету жолын жастарға үлгі ете отырып, мотивация беріп, дамыту, тың ақпарат алуға бағытталған.
Әлемді жайлаған есірткі дерті күн сайын тамырын тереңге жайып барады. Бұл адам баласының денсаулығы мен еліміздің ұлттық қауіпсіздігіне төнетін үлкен қатер. Нашақорлық – наркомания (грек тілінен narke-мелшию және mania-ессіздік, құтырыну) – есірткі заттарға патологиялық дағдыланудың нәтижесінде пайда болатын ауру. Есірткі дегеніміз адамның орталық жүйке жүйесіне әсер етіп, рухани және физикалық тәуелділікке жол ашатын, жеке адамды психологиялық жағынан, экономикалық және әлеуметтік жағынан қиындыққа әкеліп соқтырады. Нашақор адам 1 жылда кем дегенде 5 адамды осы әрекетке тартып, ауруын жұқтырады. Ол адамның есін алып, құмарлық желігіне ұшыратады, есірткісіз өмір сүре алмайтын бейшара халге жеткізеді.
БҰҰ мәліметінше әлемде 483 түрлі психикалық белсенді зат тіркелген, соның 60-ы Қазақстан және көршілес елдерден шыққан. Синтетикалық есірткінің түрлері елімізге 2015 жылдан бастап келе бастады. Бұл зиянды заттарға жастарымыз бен қоса жасөспірімдеріміз де үйір болып жүр. Оны таратудың негізгі жолы интернет.
Түркістан қаласының ішкі саясат бөлімінің «Жастар ресурстық орталығы» психологы Ақбота Маратқызы Нарымбетованың айтуынша 2024 жылдың 1 қаңтарындағы жағдай бойынша психоактивті заттарды қолдану салдарынан «психикалық мінез-құлық бұзылыстары» диагнозымен 108 722 адам динамикалық бақылауда тұр. Оның ішінде есірткі мен психотроптық заттарға тәуелді 18 329 адам. Мемлекетіміз есірткі бизнесімен және жалпы нашақорлықпен күресті бір сәтке де тоқтатпаған.Өйткені есірткі адамның денсаулығының ғана емес тұтас ұлт саулығының да қас жауы.
Түркістан облысында полиция жыл басынан бері заңсыз айналымнан 3,5 мың доза синтетикалық есірткі тәркіледі. Сонымен қатар есірткіні жарнамалау, графити жазулары бойынша 8 дерек тіркеліп, тергеу жұмыстары жүргізілуде. Есірткі жарнамалайтын 94 ақпараттық сайт анықталып, ішкі істер министрлігінің «Киберқадағалау» сараптамасына жолданып, бұғатталды. Облыс орталығында «Нашақорлыққа жол жоқ, біз өмірді таңдаймыз!» атты форумы өтті.
Бұл шаралардың басты мақсаты – жастарға есірткі мен нашақорлықтан аулақ болу және есірткі қылмыстары бойынша заң алдындағы жауапкершілік туралы құқықтық кеңес беру.
Есірткі мен нашақорлыққа қарсы алдын алу жұмыстарын атқару, жастар арасында салауатты өмір салтын қалыптастыру, үгін насихат жұмыстарын жүргізу, еліміздің болашағы –жастарды нашақорлық індетінен аластатату баршамызға ортақ міндет.
