Сенат депутаты Жанболат Жөргенбаевтың айтуынша, соңғы жылдары еліміздегі ауыл шаруашылығы алқаптарының көлемі 20,6 млн гектарға қысқарды. Ол жерді орман қорына беру, оларды тиімсіз пайдалану және жайылымдарды тиімді бөлу тетіктерінің болмауына байланысты болып отыр.
Нәтижесінде фермерлер мал жаю үшін арнайы орман билетін алуға мәжбүр. Бұл олардың жұмысын қиындатады және жайылым тапшылығын күшейтеді. Қазірдің өзінде бірнеше миллион гектар жайылым жері тапшы болып отыр.
«Орман қоры құрамындағы ауыл шаруашылығы жерлеріне кешенді талдау жүргізу, қысқа мерзімді пайдалануға берудің тәртібін қайта қарау қажет, орман қоры жерлерін цифрлық жүйеге келтіру және кадастрға енгізу керек. Аталған шаралар аграрлық сектордың дамуына, азық-түлік қауіпсіздігін қамтамасыз етуге, ауылдық аймақтардың экономикалық әлеуетін арттыруға ықпал етеді деп санаймыз», — деді депутат.
Фото: Атырау газеті
