Мәжіліс барысында білім, денсаулық, мәдениет және спорт салаларының қысқы дайындық жұмыстары қаралып, ағымдағы жылдың 25 қыркүйегіне дейін барлық нысандар әзірлік паспорттарын алуы керектігі нақты тапсырылды.
Келес ауданы бойынша жалпы 165 әлеуметтік инфрақұрылым нысаны бар. Оның ішінде 78 білім беру нысаны, 66 денсаулық сақтау нысаны, 19 мәдениет нысаны және 2 спорт мекемесі орналасқан. Білім беру саласына қажетті 5300 тонна көмір мен 120 тонна дизель отыны, денсаулық сақтау саласына 440 тонна көмір, мәдениет саласына 58 тонна көмір мен 30 тонна дизель отыны, спорт мекемелеріне 16 тонна көмір толық жеткізілген.
Аудан аумағында қатты отынды қажет ететін 3193 жеке тұрғын үй бар. Оларға жалпы 14 986 тонна көмір қажет. Сондай-ақ, 42 жылыжай кешеніне 5479 тонна көмір жоспарланған. Бүгінгі күнге жылыжайларға қажетті көмірдің 33 пайызы, яғни 1804 тоннасы тасымалданды.
Келес ауданында көмір тасымалдауға арналған жеке теміржол тұйығы жоқ болғандықтан, отын Сарыағаш ауданындағы үш тұйық арқылы жеткізілуде. Бұл бағытта «Hermes» жеке кәсіпкерлігі, «Азамат мұнай» ЖШС және «Санас» ЖШС қызмет көрсетіп отыр. Қазіргі таңда көмірдің орташа бағасы 23 мың теңгені құрап отыр.
Мәжіліс соңында аудан әкімінің орынбасары Мақсат Тұрдиев жауапты бөлім басшыларына әлеуметтік нысандарды қысқы кезеңге толық дайындап, қажетті отын қорын уақытылы қамтамасыз ету, сондай-ақ әзірлік паспорттарын белгіленген мерзімде алу бойынша тапсырмалар берді.
Тағы бір айтары, Келес ауданының әкімі Жәнібек Ағыбаев жергілікті кәсіпкер Мейіржан Әбдімәліков пен Түркиядан келген инвесторларды қабылдады. Кездесуде ауыл шаруашылығы саласында жүзеге асырылатын ірі жоба – сыйымдылығы 10 000 бас мал бордақылау алаңы, жоғары технологиялық мал сою бекеті және ет өнімдерін терең өңдеу кешенін салу мәселелері талқыланды.
Жоба құны — 15 млн АҚШ долларын құрайды. Түркиялық инвесторлар тарапынан қаржы құю үшін кәсіпкерге жер телімін рәсімдеу қажеттілігі айтылды. Өз кезегінде аудан әкімі жобаға толық қолдау көрсетілетінін жеткізіп, жер мәселесі бойынша тиісті шаралар атқарылатынын атап өтті.
Аудан басшысы инвесторлармен бірге Бозай ауылдық округіндегі жоспарланған жоба аумағына барып, іс жүзіндегі жағдаймен танысты. Бүгінде жеке кәсіпкер 4 277 ірі қара мал, оның ішінде 1 500 асыл тұқымды «қалмақ сиыры», сондай-ақ 9 200 уақ мал өсіруде.
— Біз үшін ауыл шаруашылығы – аудан экономикасының тірегі. Осындай ауқымды жобалар Келес ауданының дамуына тың серпін береді. Жергілікті кәсіпкерлер мен шетелдік инвесторлар арасындағы әріптестікке қолдау көрсету – біздің басты міндетіміз, — деп атап өтті аудан басшысы Жәнібек Есенұлы.
Жобаның іске асуы Келес ауданында жаңа жұмыс орындарының ашылуына, экспорттық әлеуеттің артуына, ет өнімдерін өңдеу мен қайта өңдеудің дамуына және ауыл шаруашылығы саласының жаңа деңгейге көтерілуіне мүмкіндік береді.
Сондай-ақ, Келес ауданында халықтың тұрмыс сапасын арттыру мақсатында инфрақұрылымды дамыту бағытындағы жұмыстар қарқынды жүріп жатыр. Соның ішінде тұрғындардың ең негізгі сұраныстарының бірі – сапалы электр қуатымен қамтамасыз ету мәселесі аудан әкімі Жәнібек Ағыбаевтың тапсырмасымен кезең-кезеңімен шешімін табуда.
Соңғы жылдары ауданның бірнеше елді мекендерінде жаңа трансформаторлар орнатылып, электр желілері тартылды. Атап айтқанда, Біртілек ауылдық округіне қарасты Ораз ата, Игілік, Көлтоған ауылдарында 7 дана жинақталған қосалқы трансформаторлық пункт орнатылып, 16,1 шақырымдық 0,4 кВ әуе электр желісі мен 2,35 шақырымдық 10 кВ әуе желісі салынды.
Одан бөлек, аудан орталығындағы Абай, Төле би, Қазыбек би, Әйтеке би, Б.Қырғызалиев, Р.Махатова және Асан Қайғы көшелерінде электр желілері жаңартылып, 1 дана жаңа трансформатор қойылды. Бұл нысандар аясында 2,97 шақырымдық 0,4 кВ әуе желісі және 0,4 шақырымдық 10 кВ электр желісі тартылды.
Сонымен қатар, Ораз ата, Игілік, Көлтоған, Лесбек батыр, Көгерту және Абай елді мекендерін сапалы электр қуатымен қамтамасыз етуге бағытталған құрылыс жұмыстары толық аяқталып, қазіргі таңда қосу жұмыстары жүргізілуде. Аудан тұрғындарының өтініш-тілектері негізінде қолға алынған бұл жұмыстар Келестегі электр инфрақұрылымын жаңғыртып қана қоймай, халықтың әлеуметтік жағдайына оң ықпал етпек.
Фото: Jambylinfo
