Спортқа жанашырлық танытқан кәсіпкерлерге ел ризашылығын білдіріп жатыр. Лайым, осы спорт кешенінде жаттыққан өрендер арасынан чемпиондар шыға берсін. Аталған спорт кешендері аудандағы спорттың дамуына серпін береріне сенім мол. Оған қоса аудан тұрғындарының салауатты өмір салтын сақтап, әртүрлі спорт түрлерімен айналысуына мүмкіндік беретін жаңа нысан – халықтың спортқа деген қызығушылығын одан әрі арттыратыны сөзсіз.
Сондай-ақ, қайырымдылық жасау қазақтың қанында ежелден бар қасиет. Асыл дініміз де мұқтаж жандарға жақсылық жасауға бұйырады. Бүгінде мемлекет тарапынан да, демеушілердің көмегімен де көпбалалы және аз қамтылған отбасыларға қолдау көрсетілуде.
Жақында Созақ ауданында тұрғындарды баспанамен қамту бағытындағы жұмыстар жалғасып, игі іс Бабата елді мекенінде жүзеге асты. Аз қамтылған отбасына «Қазфосфат» ЖШС-нің демеушілігімен алынған үй табысталды.
Ауылға арнайы барған аудан әкімі Мұхит Тұрысбеков жаңа баспананың кілтін табыстап, үй иесін қоныс тойымен құттықтады.
«Бүгінгі қуаныш – тек сіздер үшін ғана емес, барша ауыл тұрғындары үшін де маңызды. Әрбір адам өзінің шаңырағында бақытты болуы тиіс. Жаңа үй – жаңа мүмкіндіктер, жаңа бастама. Біз тұрғындардың әл-ауқатын жақсартуға, қоғамымыздың дамуына барынша қолдау көрсетеміз. Осылайша, біз бірлігімізді нығайтып, еліміздің болашағын бірге қалыптастырамыз», – деді аудан басшысы Мұхит Сексенбайұлы.
«Қазфосфат» ЖШС бас директорының әлеуметтік даму және мемлекеттік органдармен байланыс жөніндегі орынбасары Ерсін Берікұлына өз кезегінде баспана иесінің отбасына береке, бақыт және табыс тілеп, жаңа үй алдағы өмірлеріне қуаныш сыйлайтынына сенім білдірді.
«Біздің ауылымыздың болашағы осындай қамқорлықпен жарқын болмақ. Бұл қоғамымыздың дамуына және әлеуметтік теңдіктің орнауына және ауылдың әлеуметтік жағдайын көтеруге үлкен ықпал ететіні сөзсіз», – деген ауыл ақсақалдары мен тұрғындар да игі іске арқау болған барша азаматтарға ізгі тілектерін арнап, баспана иесінің қуанышын бірге бөлісті.
Айта кетейік, Бабата елді мекенінен берілген 5 бөлмелі баспанада су, жылу сынды коммуналдық қызметтері үшін жеке бөлмелер қарастырылып, жылу жүйелері толықтай орнатылған. 20 сотықтан астам жер учаскелері арнайы шарбақпен қоршалған. Ол қосалқы шаруашылықты дамытуға және бау-бақша дақылдарын өсіруге мүмкіндік береді.
Сондай-ақ Созақ ауданында үш бірдей кіші футбол алаңы мен балалар ойын алаңы ашылып, тұрғындардың игілігіне ұсынылды.
«Katco» қазақ-француз біріккен кәсіпорнының демеушілігімен салынған спорт алаңының бірі Таукент кентінде, екеуі аудан орталығындағы «Теріскей» саябағы мен Наурыз мөлтек ауданынан ашылды.
Спорт нысандарының ашылу салтанатына арнайы қатысқан аудан әкімі Мұхит Тұрысбеков шараға жиналған тұрғындарды құттықтап, жаңа нысанның маңыздылығын атап өтті.
— Бүгін біз ауданымыздың даму жолындағы маңызды қадамды атап өтудеміз. Спорт – тек денсаулықтың кепілі емес, сонымен қатар, ұлттық бірлік пен татулықты нығайтудың негізі. Бұған дейін аудан аумағындағы өндіріс орындарының демеушілігімен көптеген жобаларды іске асырдық. Бұл жұмыстар алдағы уақытта да жандана түспек. Бұл бойынша нақты жобаларымыз бар. Мақсатымыз айқын. Демеушілерден бөлек жергілікті бюджет есебінен жабық ойын алаңдары бой көтеруде және біз барлық округтерді қамтуды жоспарлап отырмыз. Жастарымыз жаңа алаңда жаттығып, үлкен спорттық жетістіктерге жетеді деген сенімдемін, – деді аудан басшысы Мұхит Сексенбайұлы.
Сонымен қатар, аудандық мәслихат төрағасы Ордабек Жәмиев ашылған спорт алаңдары – біздің ауданымыздың әлеуетін арттырудың бір бөлшегі екенін атап өтті. Шараға жиналған жұртшылықты жаңа нысанның ашылуымен құттықтады.
«Katco» БК ЖШС бас инженерінің орынбасары Нұртай Нұржанов -«Біздің компания үшін әлеуметтік жауапкершілік – маңызды басымдық. Бүгінгі спорт алаңдарының ашылуы – қоғам алдындағы міндетімізді орындау. Біз алдағы уақытта да жастардың салауатты өмір салтын таңдауына жағдай жасап, өзімізге ұсынылған жобаларды тұрақты түрде орындауға және әлеуметтің алдындағы жауапкершілікті адал атқаруға әзірміз», – деді.
Аудандық ардагерлер кеңесінің төрағасы Қабылбек Еспенбетов бастаған ауыл қариялары мен еңбек ардагерлері ізгі тілектері мен ақ баталарын арнады.
Айта кету керек, аудан әкімдігі мен «Қазатомөнеркәсіп ҰАК» АҚ әлеуметтік жобаларды қолдау аясында бірлескен жұмыстарды тұрақты түрде атқарып келеді. Осы уақытқа дейін аудандағы ауылдық округтер мен кенттерде «Қазатомөнеркәсіп ҰАК» АҚ қарасты кәсіпорындар бірнеше «Street Workout» және балалар ойын алаңы мен әлеуметтік нысандар ашып, көше жарықшамдарын орнатуда.
Бүгін «Katco» қазақ-француз біріккен кәсіпорнының демеушілігімен салынған жаңа спорт нысандары аудан тұрғындарының, әсіресе, балалар мен жасөспірімдердің салауатты өмір салтын таңдауына серпін берері сөзсіз. Бұл алаңдар тек спортпен айналысуға арналған орындар ғана емес, ауыл жастары арасында достық, ынтымақтастық және командалық рухтың нығаюына да мүмкіндік туғызары анық.
«Балалардың спортпен шұғылдануына жағдай жасалуы қажет. Спорт инфрақұрылымын біртіндеп салуды қамтамасыз етуге тиіс» деген Мемлекет басшысы Қасым-Жомарт Тоқаевтың Қазақстан халқына Жолдауына сәйкес елімізде спортты дамытуға, спорттық инфрақұрылымның балаларға барынша қолжетімділігін қамтамасыз етуге көңіл бөлінуде. Осы ретте, жеке инвестор есебінен ауданға қарасты Дарбаза елді мекенінде 500 балаға арналған заманауи үлгідегі спорт кешені ашылды. Аталған спорт кешенінің ашылу салтанатына аудан әкімі Арман Абдуллаев арнайы қатысып,ауыл тұрғындарын келе жатқан мерекемет құттықтады.
500 балаға арналған спорт кешенін жеке кәсіпкер Абылай Салимов ағымдағы жылдың наурыз айында бастап, бүгінде ел игілігіне табыстауда. Спорт кешенінде футбол алаңшасы, бокс, самбо, дзюдо, үстел теннисі, қазақ күресі, таеквандо, футбол, шахмат үйірмелеріне арналған залдар заманауи үлгідегі құрал-жабдықтармен жабдықталған.
Аталған жиын барысында аудан әкімі самбо күресінен жуырда ғана Кипр мемлекетінде өткен Әлем чемпионы атанған Е. Ахатовты, Әскерилер арасында Өзбекстанда өткен Әлем чемпионатының күміс жүлдегері, Хорватия мемлекеті, Загреб қаласында өткен Әлемдік Гранд При жарысының Чемпионы атанған Ш.Рахимовты, Греплингтен ҚР 2024 жылғы чемпионы, Филиппинде өткен Азия чемпионатының күміс жүлдегері Д.Бөрібайды, сонымен қатар дзюдо күресінен Қазақстан Республикасының үш дүркін жеңімпазы М. Серікбайды алғыс хаттармен марапаттап, бағалы сыйлықтар табысталды.
