«Есептерге қарасақ, бәрі керемет. Бірақ нақты фактілерге мән беруіміз керек. Ресми статистикаға сүйенсек, бүгінде біздің дәрі-дәрмек нарығындағы отандық өндірушілердің үлесі 10 пайызды ғана құрайды. Яғни, кем дегенде 30 пайызға жету үшін әлі де көп жұмыс істеу керек. Сондай-ақ елімізде негізгі фармацевтикалық өнімдер мен дәрі-дәрмек өндірісі былтыр 2022 жылмен салыстырғанда 10 пайызға төмендеген. Былтыр елімізде өндірілген дәрі-дәрмектің экспорты 28,5 пайыз, яғни шамамен 30 пайызға азайған. Ал, импорт 3 пайызға өсті. Мұндай жағдаймен біз Мемлекет басшысының фармацевтикалық нарықтағы отандық өнімнің үлесін 50 пайызға жеткізу туралы тапсырмасын қалай орындаймыз?», — деді бұл жөнінде Мәулен Әшімбаев.
Сонымен қатар Сенат Төрағасы отандық фармацевтикалық өнімдердің тең жартысы ДДҰ-ның сапа стандарттарына сай келмейтініне назар аударды.
Еліміздегі 43 отандық дәрі-дәрмек өндірушінің тек 25-і ғана GMP стандарттарына сәйкес келеді. Бұл – Дүниежүзілік денсаулық сақтау ұйымы қолданатын және ұсынған стандарт. Яғни, отандық өндірушілердің жартысы осы стандарттарға сай келмесе, демек, біздің дәрі-дәрмектің сапасы импорттық аналогтармен салыстырғанда бәсекеге қабілетсіз деген сөз. Көлемді ұлғайту және сапаны қамтамасыз ету жағынан да проблемалар бар.
