Депутат өз сөзінде дәрілік заттар мен медициналық бұйымдардың ұлттық тіркелімі және мемлекеттік тізілімін сақтаудың маңыздылығын атап өтті. Ұлттық тіркеу рәсімінен бас тарту еліміздің фармацевтика саласын жағымсыз салдарға әкеп соғуы мүмкін екенін жеткізді.
«Бұл процесс едәуір қаржылай салмақ салады, ол өз кезегінде дәрі-дәрмектің құнына әсер етеді. Бүгінгі таңда дәрілік заттар бағасының өсуі байқалып отыр. Мәселен, ол 2024 жылғы 1 шілдедегі жағдай бойынша өткен жылмен салыстырғанда 11,2%-ды құрайды. Дәрілік заттар айналымының жекелеген салалары шамадан тыс реттелген және бұл қосымша кедергілерге және елде дәрілік заттарға қол жеткізудің қиындауына әкеледі», — деп атап өтті Айнұр Арғынбекова.
Сенатордың деректері бойынша, қазіргі уақытта елімізде тіркелген барлық дәрілік заттардың тек 15%-ы ғана ЕАЭО талаптарына сәйкес келтіруге берілген. Ол сондай-ақ 2025 жылға дейін көзделіп отырған өтпелі кезең ұлттық тіркеуді жаңа талаптарға сәйкестендіруде айтарлықтай қиындықтармен қатар жүретінін атап өтті. Оның ішінде бұл ЕАЭО ақпараттық жүйесіндегі кемшіліктерге байланысты, бұл процесті мерзімінде аяқтауда қосымша кедергілер тудырады.
Сенатор сонымен қатар бірыңғай тіркеу куәлігі мен тізілімді енгізу ұлттық қауіпсіздік пен зияткерлік меншікті қорғауға қауіп төндіруі, сондай-ақ отандық фармацевтика өнімін өндірушілерге кері әсерін тигізуі мүмкін деп алаңдаушылық білдірді. Сенатор Арғынбекова осының негізінде Үкіметке ұлттық тіркеу куәлігі мен оларды Қазақстан Республикасының аумағында қолдануға арналған дәрілік заттар тізілімін сақтау туралы мәселені қарауды ұсынды.
Фото: Kursiv.kz
