Сондай жиындардың бірі жақында өтіп, оған кәмелетке толмағандар жөніндегі мамандандырылған сот, Адвокаттар алқасының, облыс әкімдігінің білім басқарамасының, облыстық Әділет департаментінің, АХАТ, «Анаға тағзым» отбасын қолдау орталығы өкілдері мен психологтар және жастар қатысты.
Ұлт болашағына ықпал ететін факторларға, оның ішіндегі отбасы мәселесіне қатысты келеңсіздікке қоғам, әрбір азамат салғырт қарамау керек екені баршамызға мәлім. Себебі мемлекет әрбір отбасынан құралады. Еліміздің болашағы шаңырағымыздың бүтін әрі берекелі болуына тікелей байланысты.
Ендеше отбасылық құндылықтардың маңыздылығы, оның беріктігінің негіздері қандай, шаңырақ шайқалуының негізгі себептері, оның алдын алу жолдары неде?
«AMANAT» партиясы облыстық филиалының әйелдер қанатының кеңесшісі, облыстық мәслихаттың депутаты Айман Әшімова Ана мен балаға қамқорлықта мемлекетімізде жыл сайын артып келе жатқанын айтады.
— Алайда, қазір қоғамымызда әйелдер мәселесі әлі де өткір тұр, — дейді бұл жөнінде Айман Серікқызы. — Бұл – гендерлік теңсіздік, тұрмыстық зорлық-зомбылық, білім алудың қолжетімділігі, діни радикалдану және соған байланысты проблемалар. Статистика көрсеткендей, жыл сайын Қазақстанда әрбір үшінші отбасы ажырасады екен. Әсіресе жас отбасылар арасында ажырасу көп. Бұл мәселені шешу үшін, менің ойымша, некені тіркеу туралы өтініш беру кезеңінде жас жұбайлар отбасылық құндылықтар мектебі бойынша оқу курсынан өту қажет. Мектептерде отбасылық құндылықтарды қалыптастыру, жанжалдарды болдырмау және шешу, отбасылық бюджетті қалыптастыру мәселелері бойынша тренингтер мен семинарлар өткізілгені дұрыс. Бұл жастарға саналы түрде некеге тұруға және отбасының құндылығын түсінуге мүмкіндік береді. Некенің бұзылуы едәуір қысқарады деп ойлаймын. Әйелдер қанаты осы бағытта жұмыстар атқармақ.
Шынында біздің қоғамда әлі де болса ажырасу, азаматтық неке мәселесі күн тәртібінен түспей отыр. Біріккен Ұлттар Ұйымы жүргізген «Демографиялық есеп» статистикалық деректері бойынша, Қазақстан ажырасу мәселесі ушығып тұрған әлем елдерінің алғашқы ондығына кіреді екен. Әлемде әрбір 13 секунд сайын бір отбасы ажырасады. Жыл сайын Қазақстанда әрбір үшінші отбасы ажырасады екен. Әрине, бұл алаңдауға тұрарлық жағдай.
Ажырасу үшін отбасы ең алдымен сотқа жүгінетіне бәрімізге белгілі. Ортақ баласы бар ерлі-зайыптылардың ажырасу туралы өтініштері биылғы 2023 жылдың 1 қыркүйектен бастап ювенальды соттардың қарауына жіберілетін болып шешілді. Ал бұған дейін мінездері жараспаған жұбайлар тұрғылықты жері бойынша аудандық немесе қалалық сотқа жүгініп келген еді.
Фото: Tengrinews
