Аудиторлық қорытындыда «Тараз» ӘКК» АҚ Директорлар кеңесінің 12.05.2017 жылғы N5 отырысының хаттамасына сәйкес «Тараз» ӘКК» АҚ-ның үлесін сату арқылы «Фабрика ПОШ-Тараз» ЖШС-нің қатысушылар құрамынан шығу туралы шешім қабылданғаны айтылған.
Яғни 2017 жылдың 14-шілдесінде «Тараз» ӘКК» АҚ өзінің «Фабрика ПОШ-Тараз» ЖШС жарғылық капиталындағы үлесін Болат Амангелдіұлы Момышевқа сатқан. Оның бағасы 395 307 332 теңгені құраған.
Сатып алушы Б. Момышев бұл соманы төлеу үшін Тараз қаласы, Сыпатай батыр көшесі, N8 Б мекенжайында орналасқан жалпы ауданы 2896,2 шаршы метрді құрайтын 0,3632 гектар жер учаскесінде орналасқан дәмхана, мейрамхана, бильярд залын 321 235 000 теңгеге бағалап ұсынған.
Алайда Б. Момышев шарттық міндеттемелерін толық орындамай, яғни, қалған 66 754 114,95 теңге берешекті уақтылы қайтармағандықтан «Тараз» ӘКК» АҚ Тараз қалалық сотына жүгініп, 66 754 114,95 теңге берешекті қайтаруға және 6 675 411,49 теңге көлемінде тұрақсыздық айыбын өндіріп алуға арыз берген. Сөйтіп жеке сот орындаушысының қаулысымен осынау сомаларды өндіріп алу туралы атқарушылық іс қозғалған.
Бірақ 2020 жылы 22-желтоқсанда сот бұл дауды медиация тәртібімен реттеу және істі тоқтату туралы ұйғарым шығарады. Бірақ қарыз да, тұрақсыздық айыбы да қайтарылсын деген шешім қабылдайды.
Алайда Жамбыл облысы бойынша Тексеру комиссиясының мүшесі Асылхан Шаймерденов аудит жүргізілген кезеңде берешек қайтарылмағанын алға тартады.
Ал «Тараз» ӘКК» АҚ-ның басқарушы директоры Еркін Жылысбек «Фабрика ПОШ-Тараз» ЖШС өзінің қарызын баяғыда-ақ қайтарып қойғанын айтады.
— «Фабрика ПОШ-Тараз» ЖШС қарызын өтеу мақсатында «Шұғыла» деген ғимаратын біздің балансымызға берген. Сол ғимаратпен есеп айырыстық. Онымен бүгінгі күнге ешқандай келісім-шарт жоқ. «Шұғыла» біздің баланста тұр. Қарыздың орнына осы ғимаратты берді, — дейді Еркін Жылысбек.
Осылайша Жамбыл облыстық мәслихатының тұрақты комиссиясы отырысында баяндама жасаған Жамбыл облысы бойынша Тексеру комиссиясының мүшесі Асылхан Шаймерденов «біз аудит жүргізген кезеңде қарыз қайтарылған жоқ еді» десе, «Тараз» ӘКК» АҚ-ның басқарушы директоры Еркін Жылысбек «Ол қарыз баяғыда қайтарылған» деген уәж айтып, ақырында кімнің ақпараты ақиқат екені сол күйі белгісіз боп қалды.
Фото Tengrinews.kz/Турар Казангапов
