Сот отырысында қорғаушы жақтың адвокаттары іске Нүкенованың Бишімбаевқа жазған блокнотын да қосып тіркеуді сұранды. Ол блокнотта Салтанат Нүкенова Бишімбаевқа сүйікті әйелі болатынын жазып, уәде берген көрінеді.
«Мен, Салтанат Нүкенова, Қуандыққа сенімімді қайта қалпына келтіруге уәде беремін. Мен оған сенім артамын, қызғанбайтын боламын, психологқа үнемі баруға, өзіммен және өзімнің сеніміммен жұмыс істеуге уәде беремін. Мен шын ниетіммен Қуандықты құрметтейтін боламын, тыңдайтын боламын. Отбасы жылуын сақтайтын сүйікті де қамқор әйел боламын. Жаман сөздермен боқтамаймын, бірден тұтанбаймын. Егер осындай жағдай орын алса, түсіністікпен қараймын және өзімді қолға аламын. Қуандықтың пікіріне сенуге ант етемін: оның маған жақсылық тілейтініне сенемін. Өзімнің күдікті ойларым мен сенімсіздігім арқылы оны мазаламауға уәде беремін. Біздің махабаттымызды және маған деген сезімін бағалаймын әрі құрметтеймін. Менің сүйікті Қуандығымды үнемі қолдауды, құрметтеуді, жағдайын жасауды міндетіме аламын, Қуандықпен бірге намаз оқимын, өзімнің түсінігіммен жұмыс істеймін, Алла тағаламның көмегімен біздің махаббатымызды және өз үйімізді қорғаймын, рухани өсуге талаптанамын. Ол біздің басымызды қосты, сондықтан мен өзімнің күйеуім мен өзімнің махабаттыма өте ризамын».
Міне, сот процесі кезінде Салтанат Нүкенованың өз қолымен жазылған делінген осы жазбаны қорғаушы жақтың адвокаты оқып берді.
Блокнотта жазылған бұл шағын хатқа судьяның өзі де таң қалып «әйелі күйеуіне осындай хат жазғанын бірінші мәрте көріп тұрғанын» айтты.
Ал жәбірленуші жақтың адвокаттары бұл хатқа күмән келтіріп, жақын арада қорғаушы жақтың адвокаттары Салтанат Нүкенованың атынан «Бәріне унитаз кінәлі» деп хат дайындап алып келсе де таң қалмайтынын айтты. Тіпті адвокат Вранчев бұл жазбалар неге бұған дейінгі тергеу кезінде айтылмағаны, неге енді пайда болып отырғанын сұрады.
Қорғаушы жақ бұл жазба туралы жақында ғана білгенін айтумен ғана шектелді.
Қорғаушы жақ бұл жазбаны Нүкенова өзі жазды ма, жоқ па, сол жағын анықтау үшін сараптамаға беру туралы өтініш айтқанымен судья бұл өтінішті толығымен қанағаттандырмай тастады.
