Парламент Мәжілісінің бүгінгі отырысында осылай деген депутат Бақытжан Базарбек жергілікті органдардың жауапкершілігі мен жұмысын күшейту керек екеніне тоқталды.
«Өзекті, қордаланған және әлі де болса да шешімін таппай жүрген мәселелер жеткілікті. Біз соттарды реформалау туралы заңды қабылдап, Жоғарғы соттан дербес азаматтық, қылмыстық және әкімшілік істер бойынша кассациялық соттарды құрдық. Сот төрелігіне азаматтардың қол жетімділігін қамтамасыз ету үшін кассацияны және әкімшілік істер бойынша сот өндірісінің экстерриториалдығын енгіздік. Сөз жоқ, бұл үлкен жетістік.
Бірақ соттардың заңды күшіне енген шешімдері орындалмай келеді. Себебі барлықтарыңызға белгілі. Ол үшін әлі де заңнаманы жетілдіруіміз қажет, кем тұстарын қоғамның бүгінгі сұраныстарына сай өзгерту маңызды» дейді депутат.
Тағы бір түйткіл, қоғамда мәселе шешкіш делдалдардың, яғни «помогайкалардың» көбейіп кетуі. Бұл бойынша да әділ шешім қабылдап, оларға заңмен тосқауыл қойған жөн.
Халықпен кешенді түрде жүргізіліп жатқан құқықтық реформаның жоқтығы, құқықтық нигилизм мен адамдардың сана сезімінде заңды айналып өту, заңға бағынбау, заңның жетілмеген тұстары мен кемшілігін өз жеке пайдасына бейімдеу сияқты іс әрекеттер жиілеп кетті.
Кез келген салада үзілді кесілді заңның үстемдігі орнады деу қиын. Бұл ұзақ уақыт бойы заңдарды лоббистік жолмен олигархтардың мүддесі үшін әзірлеп қабылдағанының салдары. Құрылыстағы лобби, банктік топтар лоббиі, мұнай-газ саласындағы лобби сияқты дүниелер әзірдің өзінде де бар.
Бірақ бүгінгі Парламент депутаттары мұндай қисынсыз әрекеттердің тамырына балта шауып келеді.
«Қорыта келе, Президентіміз айтқандай, «біз надандық пен ескілікке, радикализм мен масылдыққа, тоғышарлыққа және сыбайлас жемқорлыққа табанды түрде қарсы тұрамыз». Яғни бәріміз бірге еліміздегі нақты өзгерістерге деген жұртшылық сенімін нық орнықтырамыз. Осылайша халқымыздың құқықтық мәдениетін, заңдық әлеуетін арттырамыз» дейді Бақытжан Базарбек.
Фотоо: Казахстанская правда
