Сенатор бүкіл еліміз бойынша жайылым тапшылығы 29 млн гектардан асқанын, бұл фермерлердің толыққанды жұмыс істеуіне мүмкіндік бермей келе жатқанын атап өтті. Сонымен бірге, қазіргі қолдағы жерлерге үздіксіз мал жаю олардың азып-тозуына әкеліп соғады. Соның нәтижесінде ауыл шаруашылығы топырақ эрозиясына, жемшөптің қымбаттауы мен мал шығынына душар болады. Сенатордың пікірінше, пайдаланылмай жатқан жерлерді қайтарып алу жөніндегі билік тарапынан атқарылып жатқан жұмыстар да жағдайды жақсарта қойған жоқ. Бұл рәсімдер 2 жылға дейін немесе одан да көп уақытты алады. Сондықтан, шын мәнінде, соңғы 3 жылда бұл ереже жұмыс істеген жоқ.
Ольга Булавкина Сенатта қазіргі кезде жайылымдарды пайдалану мәселелері туралы Заңды жетілдіру жұмыстары жүргізіліп жатқанын айтты. Депутат осыған байланысты елдегі жайылымдарды басқаруға қатысты сұрақтарға Қазақстан Үкіметінен жауап беруді сұрады.
«Біріншіден, жайылымдық жерлердің құнарлылығы төмендеу себептері мен оларды қалпына келтіру және пайдалану процестерін басқару шаралар тиімділігінің нашар екеніне талдау жасалады ма? Екіншіден, жаңарту мен техникалық қайта жарақтандыру және жаңа мелиорациялық жүйелер салу арқылы жердің құнарлылығын қайтаруға мүмкіндік беретін технологияларға қандай инвестициялар тартылды?»,- деп сұрады Ольга Булавкина.
