Тағдыры тәлкекке түсіп, бірі өмірге жаңа келген, бірі ерекше өмірі енді ғана басталған екі жан аяқтанғанша жатар орын, ас-ауқатпен қамтамасыз етіліп, осы үйді паналайды. Сондай-ақ бұл орталықта еңбек биржасы арқылы жұмыс тауып беру жоспары да алға қойылған. Ал ең маңыздысы балалары бір жарым жасқа толғанша еш қиындықсыз осы «Аналар үйінде» тұруға мүмкіндік берілген.
Бұл үйдегі қызметкерлердің де басты мақсаты ана мен баланы айырмау, ананың баласынан бас тартуына жол бермеу.
— Аталмыш орталықтың басты мақсаты – қолында жаңа туған нәрестемен қиын өмірлік жағдайға тап болған аналарға, сондай-ақ баласынан бас тарту қаупі бар отбасыларға көмек көрсету. Перзентханамен тікелей байланыстамыз. Ондағы қызметкерлер жалғызбасты келіншектің босанғанын бірден бізге хабарлайды. Біз барып, ана мен баланың жағдайымен танысамыз. Ең құрығанда «Аналар үйінде» аз уақыт ойлана тұруына көндіреміз. «Баламды балалар үйіне өткіземін» деген райынан қайтару мақсатында бір-екі апта, бір ай, соңыра баласын қырқынан өткізіп, құшағына алып, аналық мейірімі оянғанша демеп, қолдап отырамыз. Соңыра өздері де балаға бауыр басып, қимай қалады.
Кейбіреуі үйіндегілер қабылдамай, баланы өткіз десе де, баласымен бірге болу үшін өздері пана іздеп келеді. Бұл жерде жайлы үй атмосферасы қалыптасып, ана мен балаларға барынша жайлы жағдай жасалған. Бұрын көмек алған аналар бұл үйден кетсе де, байланыс үзбей, ризашылығын білдіріп хабарласып тұрады. Кезекті шақыру бойынша жуырда қалалық аурухананың босану бөліміне бардық. 18 жасар Ж. есімді қыз баласынан бас тартпақ болған. «Ана үйі» қызметкерлері дер кезінде Ж-мен сөйлесіп, ақыл-кеңестерімізді ұсындық. Ол баласын өзі бағып, қарайтын болды, анасына хабарласып, бар жағдайды айтты. Анасы түсініп, қолдау көрсетті. Ал, жауапкершілік танытпаған жігіт хабарсыз кетті. Ж. тағдырының осылай болғанына ешкімді кінәлі санамайды. Бір білетіні ол баласымен бақытты болатынына сенімді. Енді орталықта баласын құшағына алып, аналық мейірімін беріп отыр, – дейді Жамбыл облысындағы «Ана үйі» қоғамдық қорының уәкілетті өкілі Айнұр Ажибекова.
Жалпы алғанда Ана үйінің 10 жылдық қызмет жылдары ішінде 6774 әйел қордан уақтылы атаулы әлеуметтік көмек алды. Бастысы, бөбектер балалар үйіне түспей, анасының құшағында қалды. Қазіргі таңда бұл үйде 5 әйел нәрестесімен тұрып жатыр. Қор толықтай қазақстандық меценаттардың демеушілігімен 2013 жылдан бері жұмыс істейді.
Фото: BAQ.KZ
