Жамбыл ауданы әкімі жанындағы әйелдер істері және отбасылық-демографиялық саясат жөніндегі комиссиясы отбасыларды қолдау, нығайту және қорғау, отбасылар мен олардың мүшелерінің физикалық, зияткерлік, рухани, адамгершілік дамуына ықпал ететін қажетті жағдайларды анықтау мақсатында 17 ауылдық округтерде арнайы бекітілген кестеге сәйкес ауыл әйелдерімен кездесулер өткізіп тұрады.
— Мәселен, үкіметтік емес сектор өкілдерімен кездесуде қоғамдық ұйымдарды (әкелер, аналар, ақсақалдар кеңестері, қоғамдық кеңестер) зорлық-зомбылыққа, ажырасу санын азайтуға, сондай-ақ, ерте жүктілікке жол бермеу және оның алдын алу бойынша түсіндіру жұмыстарына кеңінен тарту мәселесі талқыланды, — дейді бұл жөнінде аудан әкімі жанындағы әйелдер істері және отбасылық-демографиялық саясат жөніндегі комиссияның төрайымы, аудан әкімінің орынбасары Махпал Досымбекова. — Отбасылық құндылықтарды дәріптеу, отбасы мәртебесін нығайту және ұлттық дәстүрлерді сақтау мақсатында «Келін келсе – ырысың» атты аудандық келіндер байқауы, «Әкем, анам және мен – спорттық жанұя» спорттық жарысы секілді мәдени-спорттық шаралар және барлық ауылдық округтерде өсіп-өнген үлгілі отбасы мен жаңадан шаңырақ көтерген жас отбасыларды ауыл әкімдерінің қабылдаулары ұйымдастырылады.
Сондай-ақ, ана мен бала арасындағы қарым-қатынасты нығайту шаралары аясында қыштан құмыра жасау, сурет (картина) салу секілді түрлі мәдени-психологиялық шаралар, «Гендерлік зорлық-зомбылыққа қарсы белсенді іс-қимылдың 16 күні» республикалық науқаны аясында аудандық әлеуметтік кеңес беру кабинеті, аудандық емхана мен білім беру бөлімінің психологтарының бірлескен семинары, аудандық Аналар кеңесімен «дөңгелек үстел» отырысы және басқа мәдени шаралар өткізіледі.
Аталған науқанды ақпараттық қолдау мақсатында аудан тұрғындарына жадынамалар таратылып, аудан әкімі аппаратының мемлекеттік-құқықтық жұмыс бөлімшесі мен жеке сот орындаушысы «Ашық есік» күнін өткізіп, әйел азаматшаларға құқықтық кеңестер береді.
Тағы бір айта кететін жайт, Жамбыл ауданы әкімінің өкімімен отбасы мәселелері жөніндегі жұмыс тобы құрылған. Жұмысшы топ ажырасуға ниет білдірген отбасыларды татуластыру жолдарын қарастырумен айналысады. Жамбыл ауданы әкімдігі жанындағы жұмысшы тобы жергілікті атқарушы орган, қоғамдық ұйымдар мен құқық қорғау, денсаулық сақтау мекемелері қызметкерлерінен тұрады.
Сондай-ақ, араздасқан отбасыларын татуластыру жұмыстарына аудандық Билер кеңесі мен Аналар кеңестерінің мүшелері де белсенді түрде тартылуда. Келіп түскен ұйғарымдарды саралай келе, отбасылардың ажырасу себептері негізінен әлеуметтік мәселелердің себептерінен (жалақы көлемінің аздығы, спирттік ішімдік ішу және тағы басқа) екендігі анықталған.
Бұған қоса, отбасы институтын қолдау және нығайту шаралары аясында осы жылдың ақпан айынан бастап ауданда отбасыларға әлеуметтік-психологиялық кеңес беру кабинеті ашылған. Бүгінде кабинетке 35 әйел азаматшалар жүгінген және «Сенім телефонына» 50 қоңырау шалған. Сондай-ақ, тұрмыстық жанжал шыққан 2 отбасы татуластырылған.
Отбасылық ұрыс-керістің шығуы, тұрмыстық зорлық-зомбылықтың себептерін анықтау, ажырасулардың алдын алу шаралары аясында жыл басынан бері түрлі форматтағы 7 іс-шара ұйымдастырылған.
Отбасы мәселелері бойынша жұмысшы топ қызметінің нәтижелілігін арттыру шаралары аясында барлық 17 ауылдық округтер жанынан отбасы мәселелері бойынша жұмысшы топтар құрылған. Топ құрамына ауылдық ардагерлер кеңесі төрағасы, Билер кеңесінің төрағасы, аналар кеңесінің төрайымы және мектеп психологтары мен ауыл имамдары, үкіметтік емес ұйымдар өкілдері енгізілген.
Фото: Жалағаш жаршысы
