Депутат атап өткендей, ережелердегі жиі өзгерістер фермерлерге қиындық туғызады. Олар жұмысын дұрыс жоспарлай алмайды және жүргізу қиынға соғады, бұл күрделі жұмыстың нәтижесіне теріс әсер етеді. Субсидия беру тетіктерінің ашық болуы жөніндегі қадамдарға қарамастан, бұл рәсімдер әлі күнге дейін жабық саланың бірі болып табылады.
«Салаға жеткілікті қаржы бөлмеу дағдысы жылдан жылға созылып келе жатуына байланысты бұл мәселе бүгінгі күні өткір тақырып болып отыр. Қолдау бағдарламалары бар, олар өте маңызды, бірақ бұл үшін ақша толық көлемде бөлінбейді. Мұндай келеңсіз тәжірибе фермерлердің реформалардың шынайылығы мен мемлекеттік қолдау шараларына деген сеніміне селкеу түсіреді. Бұл жағдай жыл сайын орын алады және қайталанып отыр. Ауыл шаруашылығы министрлігінің бір аймақтың барлық саладағы тәжірибесін бақылау және кеңінен тарату жөніндегі бастамасы әрқашан тиімді бола бермейді. Жобаларды кеңінен тарату барысында климаттық жағдайға, су мен топырақтың ерекшелігіне байланысты әр аймақтың табиғи өзгешелігін ескеру өте маңызды. Осыған байланысты ауыл шаруашылығын субсидиялау жүйесін жетілдіру қажеттілігі туындап отыр», — деді Закиржан Кузиев.
Сенатор жақында Түркістан облысында сапарда болған кезде фермерлер қауымы осы мәселелердің бәрін депутаттар алдында тағы да көтергенін атап өтті. Депутат осыған байланысты АӨК субъектілеріне жеңілдетілген несие беру және субсидиялау қызметін бір цифрлық платформада біріктіруді ұсынды. Бұл ретте, жергілікті мәслихаттар өз өңірлерінде ауыл шаруашылығы дақылдары мен тыңайтқыштарды терең өңдеуге преференцияларды дербес айқындауға және субсидиялауды дамытуға белсенді қатысуға құқылы болуға тиіс.
Закиржан Кузиевтің пікірінше, мұндай шаралар субсидиялардың тиімділігін арттырады және инвестициялар ағынын қамтамасыз етеді, бұл өңірлердің дамуына оң әсер етеді.