«Атырау облысының 2021 жылға арналған жергілікті бюджетінің кірістері — 416,8 млрд.теңгені құрайды. Бұл сомадан 221,4 млрд.теңге немесе 53,1% республикалық бюджетке алынады»,- деді сенатор.
Ғұмар Дүйсембаевтың айтуынша, қаражаттың жетіспеуіне байланысты маңызды жобалар іске асырылмай отыр. Жергілікті жолдар, тұрғын үй салу, апатты және үш ауысымды мектептер салу, сондай-ақ өңірдің ондаған елді мекендерін сумен жабдықтау және газдандыру проблемалары әлі де толық шешілмеген.
Осыған байланысты сенатор облысты дамытуға республикалық бюджеттен нысаналы трансферттерді ұлғайтуды ұсынып отыр.
«Атырау үшін алып қоюлар мен трансферттердің басқа өңірлермен салыстырғанда анағұрлым төмен арақатынасына назар аударғымыз келеді. Аталған мәселені шешу үшін 2022-2023 жылдарға арналған республикалық бюджеттен облысты дамытуға мақсатты трансферттерді алып қою сомасынан 70%-нан кем емес мөлшерде ұлғайту ұсынылады», — деп атап өтті Ғұмар Дүйсембаев.
