Елорда мектептерінің бірінің ата-аналар чатында вакцина алмаған ата-аналардың балалары мектепке кіргізілмейтіні туралы ақпарат тарады. Бұған қатысты қалалық Білім басқармасы түсінік берді, деп хабарлайды ҚазАқпарат.
«1 қыркүйектен бастап балалар мектепке барады. Ата-анасы вакцина алмаған балаларды мектепке кіргізбейді. Ата-аналардың бәрін вакцина алуға шақырыңыздар», — делінген WhatsApp арқылы тараған мәліметте. Нұр-Сұлтан қаласы Білім басқармасының баспасөз қызметі бұл мәліметтің фейк екенін мәлімдеп отыр.
«Нұр-Сұлтан қаласында оқу жылын дәстүрлі форматта бастау жоспарлануда. Ата-анасы вакцина қабылдамаған бала 1 қыркүйекте мектепке қабылданбайды деген шешім шыққан жоқ», — деп жауап берді ведомстводан ҚазАқпарат тілшісінің сұрағына орай.
Еске салсақ, 11 тамызда өткен Үкімет отырысында Премьер-Министрі Асқар Мамин Білім және ғылым, Денсаулық сақтау министрліктеріне, өңірлердің әкімдіктеріне жаңа оқу жылының дәстүрлі форматта басталатындығына байланысты бірқатар тапсырма берген болатын. 1 қыркүйекте салтанатты қоңырау соғу шарасы тек 1-сынып оқушылары үшін ғана өтеді. Ал 2-11 сыныптар тікелей бекітілген кабинеттерге барып, сынып сағаттарына қатысады.
Білім және ғылым министрі Асхат Аймағамбетов, сондай-ақ мектептерде енгізілген Ashyq қосымшасы кімдерге қолданылатынын айтты. Барлық білім беру ұйымдарында қызметкерлер мен білім алушылар маска киюге міндетті. Мектептерде қосымша ауысымдар ұйымдастырылады, үзілістер уақыты әр уақытқа белгіленіп, «1 сынып — 1 кабинет» жүйесі іске қосылады.
Ал жаңа оқу жылында 1 оқушыдан коронавирус шықса бүкіл сынып қашықтан оқыту форматына көшіріледі. 9 тамыздағы жағдай бойынша, білім мекемелеріндегі педагогтердің 93,1 пайызы коронавирусқа қарсы вакцина алған.
