Қайғылы оқиға бейсенбі күні таңертеңгі уақытта болды. Комбинаттағы өлім жайлы ең алғаш хабарлаған осы кәсіпорынның жұмысшылары болған. Сонымен қатар, бұл қара хабар әлеуметтік желілерде де таралып үлгерген. Алайда, ол сәтте ресми орындар да, «АрселорМиттал Теміртау» (АМТ) компаниясы да ол туралы ештеңе айтпады.
Жұмысшының өлімін ресми түрде растаған — «AB Construction» мердігер компаниясы. Бұл компанияның жауапкершілігі шектеулі серіктестігі басшылығы жұмысшысының «оқиғадан ауыр жарақат алып, көз жұмғанын», оқиғаның жай-жапсары тексеріліп жатқанын хабарлады.
Кейінгі бір аптада «АрселорМиттал Теміртау» (АМТ) компаниясының металлургия комбинатында осымен бесінші адам қазаға ұшырап отыр. Естеріңізге салсақ, 10 маусымда төрт жұмысшы көз жұмып, қатты зардап шеккен тағы бір адам ауыр халде ауруханаға түскен. Ол жолы пештің төбесі опырылып, адамдар үйінді астында қалған.
