Мәжіліс депутаты Ардақ Назаров өзінің депутаттық сауалында бүгінде 400 мың әйел мен 60 мың еркек – жалғыз басты отбасы кебін құшып отырғанын айтады.
«Бұл не деген сұмдық?! “Екі жақсы бас қосса, бірін-бірі қиялмас. Екі жаман бас қосса, кең дүниеге сиялмас”-дегендей, біз осындай мүшкіл хәлге қалай жеттік? Қай жерден қия басып, қай тұстан қапы қалып отырмыз? Бейбіт күнде отбасының отын-суын тасып берген,Ел басына күн туса “жаным арымның садағасы”- деген намысты ерлеріміз қайда? Шаңырағының берекесі, отбасының ұйытқысы бола білген, әдебі алтын жіппен әдіптелген текті қыздарымыз қайда?» дейді депутат Ардақ Назаров.
Үкімет жетекшісіне депутаттық сауал жолдаған А. Назаров ажырасуға өтініш білдірген ерлі-зайыптылардың біржақты шешімі негізінде сотқа арыз қабылданбас бұрын арнайы мемлекеттік баж немесе жарна төлеу тәртібін енгізу қажет және бұл төлемнің көлемі едәуір жоғары болуы тиіс деген ұсыныс айтты. Сонымен қатар, ресми түрде ажырасқан тұлғалар үшін табыс салығының мөлшерлемесін кезең-кезеңімен арттыру қарастырылсын.
Сондай-ақ ажырасуға өтініш берген ерлі-зайыптылардың ісі сотқа жетпей тұрып, алдын ала осы кеңестердің қарауына ұсынылып, бітімгершілік және татуласу бағытында жұмыс жүргізілсе, көптеген отбасылардың сақталып қалуына мүмкіндік туар еді.
Фото: Егемен Қазақстан
