Любовь апаның ұлты украин болса да, қазіргі таңда мемлекеттік тілімізді көп қазақтардан артық білмесе, кем білмейді. Қазақ жігітке тұрмысқа шығып, өсіп –өніп, қадірлі әже болып отырған Любовь апайға алғыстан басқа не айтарсың. «Қазақ тілі – мемлекеттік тіл. Оны барлық қазақстандықтар білуі тиіс. Міндетті түрде қазақ тілінде сөйлеуі тиіс» дейді Любовь Михаилқызы.
Ал Төлеген мен Любовьтың бір перзенті – Руслан. Руслан Төлегенұлы газ саласында еңбек етеді. Ал келіншегі Гүлжан – Ақбұлым ауылындағы «Балауса» балабақшасында тәрбиеші. Гүлжан бұл күнде алты ұл-қыздың анасы. Жұбайы Руслан екеуі 6 ұл-қызды бағып, қағып, өнегелі тәрбие беруде. Ұл-қыздары да мақтауға, ерекшелеуге тұралық перзенттер. Шетінен талапты, талантты. Атап айтқанда, 9 сынып оқитын Нұрай мен 8 сынып оқитын Адела Тараз қаласындағы облыстық «Дарын» мектеп – интернатында білім алып жүр. Бұл жетістік пе, — жетістік. Ал осы ауылдағы Б.Бесбаев мектеп-гимназиясында Ұлдана 6, Марлен 2 сыныпта оқиды. Төрт жастаға Ерке мен екі жасар Алуа «Балауса» балалар бақшасында тәрбиеленіп жатыр. Руслан мен Гүлжан жылдар бойы перзенттеріне көңіл бөлді. Сабақтарын қадағалады, бала тәрбиесіне бейжай қарамады. Енді міне, сол еңбектің жемісін жей бастады. Бұйырса,Ұлдана мен Марлен де әпкелерінің жолымен жүретіні анық. Біз бұл шаңырақтан ене мен келіннің жарасымын, отбасының әдемі берекесі мен бақытын, шаттығын көрдік. Отбасының сол бақыты мен шаттығы еселене берсін деген тілекпен қоштастық.
