Амбулаторияны білікті дәрігер Марат Исақов басқарады. Жалпы, мекемеде 16 адам еңбек етеді. 3 мыңнан астам адам осы мекеменің қызметіне жүгінеді. Осыншама тұрғындарға ақ халатты абзал жандар қабақтарын шытпай, уақытпен санаспай қызмет етеді. Оның ішінде ұзақ жылдан еңбек етіп, елдің алғысын алғандар көп. Мысалы, мейірбике Әлия Сералиева мен акушер Ирина Мұхамедзерованың осында еңбек еткендеріне қырық жылға жуықтапты. Мейірбике Гүлнар Мүсірәлиева 33 жылдан бері көпшіліктің алғысына бөленіп жүр. Медициналық тіркеуші Шолпан Жахаева, шаруашылық бөлімінің қызметкері Доғдырхан Сәбен де өз ісінің шеберлері.
«Мекемеміздің жаңа ғимаратқа көшкені тұрғындарымыз үшін зор қуаныш болды. Жаңа ғимаратпен бірге мұнда біршама жаңа жабдықтар алынды. Бір сөзбен айтқанда халыққа қызмет көрсетуіміздің сапасы артты. Алда да ауыл халқының денсаулығын жақсарту жолында тер төге береміз» дейді бас дәрігер Марат Нұрланбайұлы.
Жалпы алғанда аудандағы 86 мыңға жуық тұрғынға 35 медициналық нысан қызмет көрсетеді. Ауданда 1 аудандық, 1 ауылдық емхана, 1 орталық аурухана, 3 фелдьшерлік-акушерлік, 15 медициналық пункт, 14 дәрігерлік амбулатория үздіксіз қызмет етеді.
