Алты ай жаз шаруашылықта 6 адам тұрақты еңбек кетсе, одан бөлек 12-15 адам маусымдық жұмыстарға тартылады екен. Тұрғындарды жұмыспен қамтуда бұл шаруа қожалықтың да үлесі бар екенін осы жағдайдан көруге болады. Бұл шаруа қожалық 2001 жылдан құрылған. Оған дейін Мұраталы Ахметұлы жеміс жидек базасында шебер, бас инженер, директордың орынбасары қызметтерін атқарыпты.
Бұл күнде М.Төлебаев Ақбұлым ауылдық округінде ақсақалдар алқасының төрағасы. Аталған алқаға 11 ақсақал мүше. Олардың жұмысын үйлестіру, одан бөлек округтегі 350 –ге жуық зейнеткердің жағдайын білу, оларды қоғамдық ортаға тарту жолында Мұраталы Ахметұлының белсенділігі жоғары. Ауылдық округ әкімі Ердос Бейсеновпен бірге ауылдың дамуы, жастардың тәрбиесі, тұрғындардың татулығы жолында еңбек етіп келеді. Көпті көрген, өмір жолы жетістіктерге толы Мұраталы Ахметұлының ауыл тұрғындарына, жастарға берер үлгісі көп.
Жалпы алғанда Жамбыл ауданы жеміс ағаштарын өсіруге өте қолайлы. Осы бағытта жұмыстар жүйелі жолға қойылып отыр. Бүгінде 235 гектар алқапқа үдемелі алма бақтары орналастырылған. Бұл шаруаны «Алтын алма», «Шоқай-Жеміс», «Агро KZT», «Садықов» ШҚ, «Сады-Востока» ЖШС, «ALTYN ALMA» және «Әулие ата Алма» АШК, «Шайқорық бауы» ӨК мен «Салман» ЖК-і табысты жүзеге асыруда. Аудандағы жеті ауылдық округте 295 жылыжай бар. Оның 265-і Қаратөбе ауылдық округінде орналасқан. Биыл бірінші айналымында 300 тонна өнім жиналып, Тараз қаласына өткерілді.
