Бұл іс-шаралардың мақсаты – отбасы-тұрмыстық қатынастар аясында құқықбұзушылықты төмендету, тұрғындар арасында болып жатқан күш көрсетудің алдын алу. Осыған сәйкес, әйел балаларының құқықтық сауаттылығын арттырып, зорлық-зомбылықтың түрлері мен себептерін зерделеп, алдағы уақытта қылмыстық әрекеттерді болдырмау бағытында тиісті жұмыстар жүргізу қолға алынды.
Бүгінгі таңда, өкінішке орай қоғамда отбасындағы зорлық-зомбылық және тұрмыстық құқық бұзушылықтар толастамай тұр. Оның ішінде, абьюзерлер тарапынан әйелдері мен балаларын аса қатігездікпен ұрып соғып жатқан фактілерді жиі көреміз.
Бұл жағдайлар өскелең ұрпақтың психикасына кері әсер ететіндігі және олардың дамуын тежейтіндігі сөзсіз. Сондықтан, бұл мәселелерді рет-ретімен шешу мақсатында елімізде әлеуметтік бағыттағы құқықбұзушылықтарды қатаңдату үшін бірқатар жүйелі шаралар қабылдануда.
Атап айтар болсақ, Ішкі істер министрлігі құрылымында әйелдерді зорлық-зомбылықтан қорғау бойынша арнайы бөлімшелер құрылды. 2021 жылы олардың штат саны 256 бірлікке дейін ұлғайтылды. Мұндай лауазымдар қазір әрбір облыстық, қалалық және аудандық полиция органдарында бар.
Сондай-ақ, әйелдер мен кәмелетке толмағандарға қатысты зорлық-зомбылық қылмыстарын тергеу бойынша әйел тергеушілердің мамандануы енгізілді.
— Мемлекет басшысы Қ. Тоқаев «Қазақстан Республикасының кейбір заңнамалық актілеріне әйелдер құқықтары мен балалардың қауіпсіздігін қамтамасыз ету мәселелері бойынша өзгерістер мен толықтырулар енгізу туралы» және «Қазақстан Республикасының Әкімшілік құқық бұзушылық туралы кодексіне әйелдер құқықтары мен балалардың қауіпсіздігін қамтамасыз ету мәселелері бойынша өзгерістер мен толықтырулар енгізу туралы» Заңдар бір топ Парламент депутаттарының бастамашылығымен әзірленген болатын, — дейді сенатор Бекбол Орынбасаров. — Заңның негізгі мақсаты – әйелдер мен балалардың құқықтары мен заңды мүдделерін қорғау шараларының тиімділігін арттыру болып табылады. Мұның барлығы мемлекеттік деңгейде заң мен тәртіптің қатаң сақталу қағидаты дәріптелуіне, ал қоғамда қылмысқа мүлдем төзбеушілікті орнатуға бағытталған. Бұл шаралардың қабылдануы — құқықтық қоғам құру жолындағы маңызды қадам деп есептеймін.
Фото: Aikyn.kz
