Сенатор Ғалиасқар Сарыбаев өзінің депутаттық сауалында денсаулық сақтау және міндетті әлеуметтік медициналық сақтандыру саласындағы проблемаларға байланысты қазіргі тетіктерді қайта қарауды және медициналық мекемелерді қаржыландыруды жақсартуды ұсынды.
Сенатор Сарыбаевтың пікірінше, денсаулық сақтауды қаржыландырудың қолданыстағы үлгісі саланың өзекті мәселелерін толық шеше алмайды. Депутат өзінің сауалында саланы қаржыландыру 2,5 есе көбеюіне қарамастан, оның ЖІӨ-дегі үлесінің көрсеткіші небәрі 3,7%-ды құрайтынын атап өтті. Салыстыру үшін Дүниежүзілік денсаулық сақтау ұйымы дамушы елдерде ЖІӨ-нің 5-8%-ды және дамыған елдерде кемінде 9%-ды салаға жіберуді ұсынатынын айтты.
Депутат Талдықорған қалалық көпсалалы ауруханасындағы жағдайды мысалға келтірді. Мекеме ауыр қаржы қиындығына тап болуда, оның ішінде 1,2 миллиард теңге несие берешегі бар, оған салық міндеттемесі, медициналық қызмет пен дәрі-дәрмекті сатып алу және коммуналдық шығындар кіреді. Аурухананың 370 төсек орыны бола тұра, 284 төсек орны ғана қаржыландырады. Бұл жоспарлы емдеуді азайтуға және шұғыл емдеуге жатқызуды 87%-ға арттыруға әкеліп соққан.
«Міндетті әлеуметтік медициналық сақтандыру жүйесін трансформациялау бойынша заң аясында ұсыныс енгізу керек. Медициналық мекемелердің қаржылық жағдайын, сала қызметкерлеріне еңбекақы төлеу және міндетті медициналық сақтандыру жүйесінің тариф мәселелерін кешенді түрде шешу керек», — деді сенатор Ғалиасқар Сарыбаев.
Фото: gorbol-tk.kz
