Сенатор Амангелді Нұғмановтың айтуынша, азаматтардың қызметке жарамдылығын анықтайтын әскери-дәрігерлік комиссия жұмысының барысында елеулі қиындықтар туындап отыр. Негізгі қиындықтардың бірі – сапалы тексеру жүргізуге уақыттың болмауы, заң бойынша топтарды жасақтауға үш күн ғана уақыт бөлінетіні қателіктерге жол береді. Қажетті медициналық рәсімдер мен зертханалық және аспаптық зерттеу жүргізу үшін бұл мерзім жеткіліксіз.
Көптеген әскерге шақырылушылардың міндетті әлеуметтік медициналық сақтандыру қорында сақтандырылмағандығы да қиындық тудырады. Бұл денсаулыққа қатысты шағым болған жағдайда оларды жан-жақты тексеруді қиындатады, өйткені сақтандыру жарнасының төленбеуі толыққанды медициналық тексеруге кедергі келтіреді. Сенатор осы және басқа да проблемалар әскери қызметке шақыру процесіне сенімді азайтатынын және азаматтардың әскери міндетті атқаруға деген көзқарасына теріс әсер етуі мүмкін екенін атап өтті.
«Шақыру науқаны кезеңінде әскерге шақырылушыларды мемлекет есебінен сақтандырылған адамдар ретінде жеңілдігі бар санатқа заңнамалық енгізу мүмкіндігін қарастыру қажет. Бұл жерде әскери комиссариаттың жолдамасы бойынша медициналық куәландырудан өтіп жатқан әскерге шақырылушыларды медициналық қызметке ақы төлеуден босату туралы айтылып отыр. Бюджеттік саясат қағидатын сақтау, қаржының экономикалық тиімділігі мен шығыстарын оңтайландыру тәртібі бойынша облыстық бірыңғай әскерге шақыру медициналық комиссиясын құру мәселесін зерделеу қажет деп санаймыз. Бұл бірнеше рет тексеруге жұмсалатын шығындарды едәуір қысқартуға және жергілікті бюджетке түсетін жүктемені азайтуға мүмкіндік береді. Одан бөлек, әскерге шақырылушылардың учаскелік емханада тіркеуден өтуі және қорытынды сондағы қорытындыны әскери комиссариатқа беруі ұсынылады», — деді Амангелді Нұғманов.
Фото: prizivnika.net
