Ұлттық құрама сапында Жамбыл облысының 17 спортшысы өнер көрсетіп 7 алтын, 7 күміс, 3 қола жүлде еншіледі.
Жарыстың алғашқы күні қазақ күресінен 56 келіде Рауза Нұрмахамметова жеңімпаз атанса, кураш күресінен 81 келіге дейін Бекәділ Шәймерден қола медаль алған болатын.
Сондай-ақ, кураш күресінен 60 келіде Сүлеймен Ернұр, 66 келі салмақта белдескен Айбек Қазақбаев және 73 келіде боз кілемге көтерілген Нұрдін Шаймерден күміс олжаласа және дәл осы салмақтағы Әділет Ахметғалида жеңіс тұғырының үшінші сатысынан көрінді.
Сондай-ақ, айта кетерлік жайт Түрік халқының ұлттық ойындарының бірі ашыртмалы аба гюрешинен 60 келі салмақтағы Ернұр Сүлеймен мен 70 келі салмақта белдескен Әділет Ахметғали сынды балуандарымыз қос күрес түрінде бақ сынап қос күміс жүлдеге қол жеткізді.
Көкпардан ұлттық құрама сапында айтулы аламанда ел намысын әулиеатаның Құрманбай Есжан, Тұрғанбек Құрманбек, Тоғайбаев Құлажан, Мәлімбай Ернат, Асыл Елдос, Ернар Жарылқасын сынды спортшылары қорғап чемпион атанса, көкбөрү сайысында ел құрамасы қатарында Ислам Рәт және Айнабек Бердіқұлов күміс медаль иеленді.
Байрақты бәсекенің соңғы күнінде ителгі құсы сайысында жамбылдық Бабажан Бағдәулет үшінші орынға табан тіреген болатын.
Дүниежүзілік көшпенділер ойынында жалпыкомандалық есепте Қазақстан құрамасы 43 алтын, 34 күміс, 37 қола медаль иеленіп, жалпыкомандалық есепте топ жарды.
8-13 қыркүйек аралығында өткен додаға 89 елден 2500-ге жуық спортшы қатысты.
Көшпенділер ойындарының символы торсық Қырғызстанға тапсырылды
Ендігі кезекте VI Дүниежүзілік көшпенділер ойындары 2026 жылы Қырғызстанда өтеді.
