«Мемлекет басшысы, қолайлы инвестициялық ахуал жасау үшін жан-жақты күш салуда. Бірақ, соған қарамастан экономикамызда инвестицияларды тарту жағдайы жоғары дәрежеде емес. Мәселен, 2023 жылы тікелей шетелдік инвестициялардың жалпы ағыны 23,4 млрд. долларды құраған. Бұл көрсеткіш 2022 жылы 28,2 млрд. доллар болғанын ескерсек, оның 16,9%-ға төмендегенін көреміз. Мұнда бір ескеретін жайт, бұл көрсеткіштердің төмендеуі, мемлекеттің осы салаға көптеп көңіл бөліп жатқан жағдайында орын алып отырғандығы», — деді депутат.
Депутат осыған байланысты бұған дейін Үкіметке инвестициялық ахуал мәселесі бойынша Үкімет сағаты барысында сенаторлар мен сарапшылар әзірлеген ұсынымдар жіберілгенін атап өтті. Алайда олардың барлығы бірдей жүзеге асқан жоқ. Атап айтқанда, басым жобаларды іске асыруды оңтайландыру және басқа да маңызды шаралар бойынша ұсыныстар қаралған жоқ. Сұлтанбек Мәкежанов инвесторларға берілетін салық преференциясын пайдаланудың тиімділігі мәселесін де қозғады. Ол берілген жеңілдіктер сомасы инвестиция көлемінен асатын жағдайларды атап өтті. Бұл мұндай жобалардың дұрыстығына күмән туғызады.
«Осыған байланысты, шетелдік инвестициялар ағынының азайғаны үшін жауапкершілік анықталады ма деген заңды сұрақ туындауда. Қазіргі уақытта аталған инвестициялық штаб қызметінің тиімділігі, нақты нәтижелері, оның ашықтығы қандай деген және тағы басқа да сұрақтар көптеп туындауда»,- деп сұрады сенатор Мәкежанов.
Фото: Егемен Қазақстан
