Іс-шараға полиция қызметкерлерімен бірге Көліктік бақылау инспекциясы, Жамбыл облысы бойынша Мемлекеттік кірістер департаменті, Жолаушылар көлігі және автомобиль жолдары басқармасының өкілдері қатысуда. Іс-шара барысында республикалық, жергілікті маңыздағы автожолдарда және көше жол желісінде жолаушыларды, багажды тасымалдайтын көліктермен болатын құқық бұзушылықтарды анықтау бойынша бірқатар нәтижелі жұмыстар атқарылуда.
Рейд кезінде қоғамдық көлік жүргізушілерімен жол жүрісі қағидаларын бұзудың 501 дерегі анықталды.
Мәселен, заңсыз жолаушыларды тасымалдаған — 3, заңсыз қайта жабдықтау жасаған 33, рейс алдындағы техникалық және медициналық қарап-тексеруден өтпеген — 5, мемлекеттік немесе міндетті техникалық қарап-тексеруден өтпеген көлік құралын басқарған — 44, көлік басқару кезінде ұялы телефон пайдаланған — 56, белгіленген жылдамдықты асырған — 75, маневр қағидасын бұзған 60 автобус жүргізушісі әкімшілік жауапкершілікке тартылды.
Сондай-ақ, арнайы айып тұрағына 13 автобус қойылып, олардың ішінен 10 көліктен мемлекеттік тіркеу нөмірлерінің белгісі алынды.
Аталмыш іс-шараға жедел жәрдем қызметкерлері де атсалысып, қоғамдық көлік жүргізушілері жолда ұйықтап кетпеу үшін денсаулық жағдайларына тексеру жүргізуде.
Жамбыл облысы Полиция департаменті азаматтардың қауіпсіздігі және жол апаттарының алдын алу мақсатында қоғамдық көлік жүргізушілерін ережелерді қатаң сақтауға шақырады.
