Жамбыл облыстық мәслихатының кезектен тыс XIV сесиясында депутат Арман Еділбаев «Биофарм» зауытының құрылысына тағы 2 млрд теңге бөлініп отыр. Бұл қаржы қайтады ма?» деген сауал жолдады.
Сандуғаш Абдралиева, Жамбыл облыстық экономика және бюджеттік жоспарлау басқармасының басшысы:
— Бұл қаражат негізі республикалық бюджеттен бөлінуі керек еді. Қазір елімізде су тасқынынан кейінгі қалыптасқан жағдайға байланысты республикадан қаржы бөлінбейтін болды. Қаржы жергілікті бюджеттен қарастырылады.
— Бұл зауыт облысқа қарамайды ғой? Қаржы бөлу қалай болар екен?
— Негізі бюджеттік инвестиция жоба жергілікті бюджеттік жоба болып кете береді. Бәрі заң аясында. Өйткені бұл зауыттың құрылысы Жамбыл облысының аумағында жүргізіліп жатыр. Үкімет тарапынан бұл жобаның маңыздылығы ескеріліп биыл аяқталуы керек деген тапсырма келген. Қаражат облыстық бюджеттен бөлініп отыр. Әрине, бұл бағытта жұмыстар атқарылады, бірақ бұл қаржы нақты қайтады, қайтпайды деп айта алмаймын. Өйткені ол республикалық бюджеттен қаржының бөлінуіне байланысты.
Жалпы бізде 171 млрд теңгеге дайын жобалар бар. Бәрінің мемлекеттік сараптамасы бар. Республикаға өткізіп қойдық. Республикада жыл сайын бюджетті нақтылау наурыз айында өтетін. Биыл нақтылау болмады. Алдағы уақытта бола ма, жоқ па, ол да белгісіз.
