Естеріңізге сала кетейік, сәуір айында Respublica партиясының тең төрағасы Руслан Берденов букмекерлік кеңселердің қызметіне қатысты Премьер-Министрге депутаттық сауал жолдаған болатын. Мәжілісмен ойынға құмарлықтың қоғамда, әсіресе әлеуметтік осал топтар мен жастар арасында таралуы мәселесін көтерді. Құмар ойындарға тәуелділік отбасының бұзылуына, қылмысқа және суицидке әкеледі. Сонымен қатар, букмекерлік кеңселердің табысы үш жыл ішінде жеті есеге жуық өскенін атап өтті. Депутат ойын бизнесінің таралуын шектеуге бағытталған бірқатар шараларды ұсынды, оның ішінде барлық ақпараттық алаңдарда жарнамаға тыйым салу, букмекерлік ұйымдар қызметтерін төлеуде карталарды қабылдауға шектеу қою, осы зұлымдыққа қарсы күресте халықаралық тәжірибені елімізде зерделеу және енгізу. Қыркүйек айында ел Президенті Қ.Тоқаев Қауіпсіздік кеңесінің отырысын өткізіп, онда халық арасындағы ойынға тәуелділік мәселесін көтерді. Мемлекет басшысы жастардың тәуекел тобына жататынына тоқталып, мемлекеттік органдарға азаматтардың жекелеген санаттары үшін ойын бизнесіне шектеу қою жұмыстарын күшейтуді тапсырды. Парламент Мәжілісіндегі Respublica партиясының фракциясы қолданыстағы заңнамаға бірқатар түзетулер әзірледі, оның мақсаты — ойынға тәуелділіктің кері әсерін азайту. Премьер-Министрдің айтуынша, букмекерлік кеңселерді, тотализаторларды және онлайн казиноларды жарнамалауға тыйым салынады. Құмар ойындарға қатысудың рұқсат етілген жасы 25-ке дейін көтеріледі. Сонымен қатар, бірыңғай тізілімінде тұрған борышкерлердің, алимент төлемегендердің және банктік несиелер бойынша мерзімі өткен берешегі бар тұлғаларға ойындарға қатысуға тыйым салынады. Осы және басқа да шаралар Қазақстандағы құмар ойындарға тәуелділік мәселесінің ауырлығын төмендетуге бағытталған, деді Әлихан Смайылов. Қазір тиісті заңнамалық түзетулер Парламентте қарастырылуда.
