INNOPROM.QAZAQSTAN 25-27 қыркүйекте Астанада алғаш рет өтетін болады. 2010 жылдан бері Ресейде өтіп келе жатқан INNOPROM көрмесі бұған дейін үш жыл қатарынан Ташкент (Өзбекстан) қаласында өткен.
ҚР Өнеркәсіп және құрылыс вице-министрі І.Оспановтың айтуынша INNOPROM көрмелері кезінде қол жеткен уағдаластықтар нәтижесінде 26 бірлескен кәсіпорын құрылса, тағы 23 бірлескен жоба бойынша жұмыстар жүріп жатыр.
«Бізді қосымша құн беретін өңдеу саласы қызықтырады. Мәселен, мұнай-газ және тау-кен машиналарын жасау саласы бойынша атқарылатын жұмыстар ауқымы өте кең» — деп атап өтті І.Оспанов. «Қазір пружина жасау зауыты, тау-кен машиналарына қосалқы бөлшектер жасайтын өндіріс, шина зауыты, мұнай-химия өнімдерін өңдеу, сондай-ақ бірнеше фибромембрана жобасы жүзеге асып жатыр».
Баспасөз мәслихатының спикерінің айтуы бойынша INNOPROM.QAZAQSTAN көрмесі, әсіресе, орта және шағын бизнес өкілдері үшін маңызды іскерлік алаңы деп есептейді. Өйткені бұл, біріншіден, көптеген бизнес өкілдерін бір ортадан табуға мүмкіндік береді. Екіншіден, бизнестің лауамызды өкілдерімен В2В форматындағы кездесулер өткізуге болатын орын. Үшіншіден, бизнесті жаңадан бастап жатқан кәсіпкерлерге мүмкіндіктер көкжиегін көрсететін көрме. Төртіншіден, жас мамандар мен білім ұйымдарына бизнеске қажетті компетенциялар бойынша сұраныс деңгейін анықтауға мүмкіндік. Сондай-ақ көрменің есігі қарапайым тұрғындар үшін де ашық, олар елімізде қандай өндіріс орындары бар және олар не өндіреді деген сұраққа жауап таба алады.
Көрменің тағы бір маңызды бөлігі 27 қыркүйекте өтетін студенттер мен жас мамандарға арналған Қазақстан мен Ресейдің білім беру орталықтары мен өнеркәсіптік компаниялары дайындаған «Жаңа өнеркәсіпке арналған жаңа кадрлар» іс-шарасы. Сонымен қатар, көрме аясында жергілікті өндіріс орындарындағы 250 бос орынға жәрмеңке ұйымдастырылады.
Көрмені ұйымдастырушылардың басты міндеті – жаһандық тәжірибе алмасу, өнеркәсіптік кооперацияларды дамыту, жаңа нарықтар ашу, серіктестіктер және тиімді логистика жолдарына мүмкіндік туғызу.
Сондай-ақ, «EXPO» халықаралық көрме орталығында өндіріс салаларындағы ірі кәсіпорындар қатысатын стендтер ұсынылатын болады. Олардың қатарында: сорғы, компрессорлық және блоктық-модульдік технологиялық жабдықтарды; кабельдік-өткізгіш өнімдерді; өнімді қорапқа салу роботтандырылған жүйелерін; пакерлік жабдықтар мен ұңғымалық құрастырмаларды; арматура мен оқшаулағыштарды; сепараторлар, сүзгілер, ыдыстар мен аппараттарды; қасбеттік кассеталық панельдерді шығаратын және тағы да басқа компаниялар бар.
