Бүгінде Жамбыл облысында жинақталған қалдықтардың көлемі – 65,3 мың т құрайды. Оның өңдеуге жіберілгені 8,3 мың т. Ал биыл облысы әкімдігінің табиғи ресурстар және табиғат пайдалануды реттеу басқармасына қойылып отырған индикатор 15,1% болып бекітілген. Бірінші жарты жылдықтың қорытындысы бойынша жоспар 9,2% болса, оның орындалуы 103,8%-ды құрады.
Аймақта тұрмыстық қалдықтар саласында 33 кәсіпорын жұмыс істеуде. Оның 22-сі Тараз қаласында орналасқан. Олар 124 арнайы техникамен қамтылған. Бұдан бөлек, 501 алаң 3961 контейнермен жабдықталған. Қалдықтарды бөлек жинау үшін контейнерлердің 3 түрі орнатылған. Атап айтсақ, қоқыс алаңдарына 700 торлы, 106 жабық, 3155 қатты тұрмыстық қалдықтарды жинауға арналған контейнерлер қойылған.
Аудан орталықтарындағы қалдықтар 5 компонентке, яғни пластмасса және пластикалық қалдықтар, пластикалық бөтелкелер, шыны, қағаз қалдықтары, қаңылтыр банкалар бөлу арқылы сұрыпталады. Жиналған қатты тұрмыстық қалдықтар престен өткізіліп, шикізат алу үшін Алматы мен Шымкент қалаларына қайта өңдеуге жіберіледі.
Басқарма тарапынан тұрмыстық қалдықтарды кәдеге жарату мәселесін шешу үшін өңірде инвесторларды тарту бойынша жұмыстар жүргізілуде. Қазіргі таңда «Hasanat group» компаниясы, «Байтақ болашақ» республикалық қоғамдық бірлестігі, «Инсипром» және «Ecoplatform», «ТазаБиоИнвест» ЖШС-тері және «Еуразиялық қайта құру және даму» банкімен келіссөздер жүргізілуде. Бірақ бұл жұмыстардың келіссөздер деңгейінде қалуына басты себеп, бүгінгі таңда тарифтің төмендігі, тұрмыстық қалдықтардың салыстырмалы түрде аз көлемі, инфрақұрылымның дамымағандығы біздің өңірге инвесторлардың қызығушылығын тудырмауда.
Жамбыл облысына инвестиция тарту және инвесторлармен кездесу бойынша өткен кеңесте Кореялық «Чанджо» компаниясының инвестициялық жобасы бойынша тұрмыстық қалдықтарды электр энергиясын алу арқылы қайта өңдеу жобасы ұсынылды.
Бүгінгі таңда облыста барлығы 163 полигон және қоқыс төгуге арналған орын жұмыс істеуде. Оның 5-і жеке меншікте болса, 158-і коммуналдық меншікте. Полигондардың барлығының қоршаған ортаға арналған эмиссияға рұқсаты рәсімделген.
Өткен жылы кездейсоқ 165 стихиялық қоқыс орны анықталған болатын. Жыл ішінде 138 қоқыс үйіндісі жойылып 85 пайызды құраса, Тараз қаласы бойынша 24 орын жойылмады. Ол бойынша жауапты азаматтарға айыппұл салынған.
Осы жылы «Қазақстан Ғарыш Сапары ҰК» АҚ-ның ғарыштық мониторингпен қамту аймағы ұлғайып 48 стихиялық қалдықтар орны белгілі болды. Оның 9-ы Тараз қаласы, 1-еуі Байзақ, 8-і Жамбыл, 14-і Жуалы, 1-еуі Меркі, 8-і Мойынқұм, 7-еуі Шу аудандарынан анықталған.
