Бүгінгі таңда Жамбыл облысындағы мемлекеттік орман қорының жалпы көлемі 4 миллион 427 мың гектар алқапты алып жатыр. Оның орман ағаштары көмкерген алқабы 2 миллион 357 мың гектарды құрайды. Орман қоры жерлері облыс аумағының 30,8 пайызын, ал орманды жерлері 15,5 пайызын алып жатыр.
Осынау аумақты орман шаруашылығы мекемесінің 931 қызметкері қорып, күзетумен қатар, оны ұлғайту жұмыстарын да атқарып келеді. Өткен жылы орман екпелері 3054 гектар алқапқа отырғызылып, 2750 гектарға сексеуіл тұқымы себілген еді.
Жылда мемлекеттік орман қоры аумағындағы 5000 гектар алқапқа орман ағаштары көшеттен және тұқымынан егіліп келеді. Мемлекет басшысының 2020 жылғы 1 қыркүйектегі «Жаңа жағдайдағы Қазақстан: іс қимыл кезеңі» атты халққа жолдаған Жолдауына сәйкес республика бойынша отырғызылатын 2 миллиард ағаштың 140 миллион түп ағашы 2021-2025 жылдары Жамбыл облысының мемлекеттік орман қорына отырғызылуы тиіс. Бұл тапсырманы орындау мақсатында «Жамбыл облысында 2021-2025 жылдары ормандарды молықтыру және молайту туралы» кешенді жоспар бекітілген. Сол жоспарға сәйкес, биыл 13 660 гектар алқапқа 24,5 миллион дана ағаш отырғызу жоспарланған, — дейді орман шаруашылығы және ерекше қорғалатын табиғи аумақтарды қорғау бөлімінің басшысы Данияр Башанов.
Өткен жылы мекемелерде жоспар бойынша 49 гектарға тұқымбақ (қарағаш, жүзген, сексеуіл) жасақталып, онда 1 миллион 432 мың қарағаш, 4 миллион 837 мың сексеуіл көшеті өсірілген. Жоспарға сәйкес 4,4 гектар алқапты алып жатқан тұқымбаққа 25 мың дана қарағай, шырша, арша, басқа да қылқан жапырақты ағаш көшеттері отырғызылған. Күзде сексеуіл тұқымбақтары 44 гектарға арттырылып, тұқымбақтар көлемі 93 гектар алқапқа жеткізілмек.
Биыл жоспарға сәйкес орманды молықтыру және қалпына келтіру үшін көктемде 5190 гектарға 15,2 миллион дана көшет отырғызылған. Бұдан бөлек, 250 гектар алқапқа 253 мың дана көшет отырғызылып, орман қорына толықтару жұмыстары атқарылған. Енді күзде 8190 гектарға жоспардан қалған 9,3 миллион дана ағаш көшетін тұқымнан себу жұмыстарын орындау көзделген. Осылайша, бүгінгі таңда бұл жоспар белгіленген меже аясында орындалуда.
Енді күз айларында 4 мың гектар орман қорына 20 мың килограмм сексеуіл ағашының тұқымын себу жұмыстары жоспарлануда.
