Тараз қаласы – республикамыздағы кәріз суларын биологиялық тазартатын арнайы стансасы жоқ жалғыз облыс орталығы. Бұл мәселені республикалық деңгейде көтеріп жүргендердің бірі Қазақстан Республикасы Парламенті Мәжілісінің Сенаторы Әбдәлі Нұралиев.
Ол Премьер-Министрдің атына жолдаған депутаттық сауалында, жұмыс сапары барысында Жамбыл ауданының Қостөбе ауылы тұрғындарымен болған кездесуінде жерлестерінің өтініші себеп болғанын атап өтті.
Осы мәселені өз бақылауына алған сенатор Үкіметке: «Қазіргі таңда, көтеріліп отырған мәселенің өзектілігін ескере отырып, қалалық кәріз суларды тазалау кешенін салу жобасының ТЭН дайындалып «Мемлекеттік сараптама» РМК-ның қарауына ұсынылғанымен қабылданған мараторияға сәйкес жоба тоқтап тұр. Тараз қаласындағы кәріз суларды тазалау кешенін салу жобасының іске асырылуына қолдау көрсетіп, республикалық бюджеттен қаржыландыру мәселесіне ықпал етуіңізді сұраймыз»,- деп ұсыныс хатта тастаған.
Бұл мәселе облыс әкімі Нұржан Нұржігітовтың төрағалығымен өткен аппарат кеңесінде де бірнеше рет қайтара қаралып, талқыланды да. Облыс әкімдігі энергетика және тұрғын үй коммуналдық шаруашылығы басқармасының басшысы Құдайберген Қорғанбаевтың айтуынша, жоба бойынша екі ұсыныс қаралған. Біріншісі, Тараз қаласы үшін заманауи кәріздік тазарту имаратын салуда уақытты тиімді пайдалану үшін 2019 жылы әзірленген техникалық-экономикалық негіздемесін жаңартып, сараптамадан өткізу шығындарын демеушілер есебінен қарастыру ұсынылған. Екіншісі – техникалық-экономикалық негіздемені жаңадан әзірлеуге облыстық бюджет есебінен қаржы бөліп, тез арада жобалаушы мекемені анықтау үшін мемлекеттік сатып алу конкурстарын ұйымдастыру.
Жобаға қызығушылық танытқан «Hasanat Group» ЖШС директоры Нұрлан Иманқұлов пен «Ақ Қамыс» ЖШС директоры Аян Темірәлі өз ұсыныстарын айтып, жобаға инвестиция салуға ниетті екендіктерін жеткізді.
Қала басшылығы «Қазақ су шаруашылығы ғылыми-зерттеу институты» ЖШС қорытындысын негізге алып және сүзгі алқабында қалдық сулардың шектен тыс көбеюіне байланысты апаттық жағдайдың орын алуы ескеріліп, төтенше жағдай аумағы ретінде қабылдау мәселесі қаралуда екенін атап өтті.
