Сәбит Теналұлы осы ауылдың имандылығы, елдің тыныштығы, дін бағыты бойынша тұрақтылық жолында тер төгіп жүр. Қалаға жақын орналасқандықтан, жамағаттың ішінде де түрлі көзқарастағы адамдар кездесетіні анық. Бас имам ауыл қарияларымен жастар тәрбиесіне, оның ішінде имандылықтың өрістеуі жолына зор күш беруде.
Бұл ауылдың мешіті бар, ендігі бір «әттеген –айы» мәдениет үйінің жоқтығы еді. Бұл мәселе ауыл ақсақалдары тарапынан көтеріліп жүр. Облыстағы, аудандағы басшылар бұл жағдайдан толық хабардар. Бұйырса 2022 жылы мұнда мәдениет ошағын салу көзделуде. Демек, ақбұлымдықтардың өздерінің мәдениет үйінде ән салып, би билейтін, өнер көрсететін күндері де алыс емес. Ақбұлымда тұратын өнерлі адамдар, өнерлі өзге ұлт өкілдері, жастар сол күндерді асыға күтіп жүр.
Жалпы алғанда 2001 жылы Жамбыл ауданында 12 ауылдық клуб қана жұмыс істеген болатын. Ал бүгінде ауданда 1 аудандық,, 3 ауылдық Мәдениет үйі, 15 ауылдық клуб, 1 «Зерде» бейнемобиль жұмыс атқаруда. Өткен жылдың өзінде Қаракемер ауылдық округінде 90, Жалпақтөбе ауылында 180 орындық жаңа мәдени орда есігін айқара ашты. Сондай-ақ, азаттықтың алғашқы жылдарында ауылдық клубтың бірде-бірінде компьютерлік құралдар болмаса, қазір барлығы заманауи құрылғылармен толықтай жабдықталған.
Мәліметтерге сүйенсек, 2002 жылы аудандық мәдениет үйі бойынша құрылым саны 45, оған 491 өнерпаз қатыстырылса, 2021 жылы құрылым саны 90, қатысушы саны 924-ті құрап отыр.
