2026 жылғы 11 тамызда сағат 19:00 шамасында Жамбыл облысы бойынша ҚАЖ департаментіне қарасты №59 мекемесінде жедел ақпаратты іске асыру мақсатында мекеменің режим және жедел қызметкерлері тарапынан өткізілген іс-шара барысында тыйым салынған заттарды мекеме аумағына өткізу әрекетінің жолы кесілді.
Рейдтік-профилактикалық іс-шара барысында Аскаров көшесі бойындағы №4 және №5 бақылау бекеттері маңында күдік тудырған азамат байқалған. Азамат мекеме қызметкерлерін көрген кезде қолындағы скотчпен оралған түйіншекті мекеме аумағына қарай лақтырып, оқиға орнынан жасырынуға әрекет жасаған. Алайда мекеме қызметкерлерінің жедел әрі үйлесімді әрекетінің нәтижесінде оның әрекеті тоқтатылды.
Тексеру барысында аталған түйіншектің ішінен бір дана зарядтау құрылғысы, бір USB сымы және Redmi маркалы екі ұялы телефон табылды. Ұялы телефондар SIM-картасыз және графикалық кілтпен бұғатталған.
Алдын ала анықталған мәліметтерге сәйкес, тәркіленген заттар №59 мекемесінде жазасын өтеп жатқан сотталған азаматқа арналған.
Аталған факті бойынша материалдар заңнамада белгіленген тәртіппен тіркеліп, тиісті құқық қорғау органдарына хабарланды. Қазіргі уақытта оқиғаның барлық мән-жайын анықтауға бағытталған жедел-тергеу іс-шаралары жүргізілуде.
Жамбыл облысы бойынша ҚАЖ департаменті азаматтарды қылмыстық-атқару жүйесі мекемелерінің аумағына тыйым салынған заттарды жеткізуге әрекет жасамауға шақырады. Мұндай әрекеттер заңнамада белгіленген жауапкершілікке әкеп соғады.
