Бұрын тек шетелде немесе елордада ғана жасалатын күрделі операциялар бүгінде өңірде жүзеге асырылуда. Сондай-ақ жылжымалы медициналық кешендер арқылы 486 ауылдағы 434 мыңнан астам тұрғын тексеруден өтті. Ана мен бала денсаулығын қорғау бағытында да нақты нәтижелер бар. Нәресте өлімі 18,3 пайызға, бала өлімі 14,9 пайызға төмендеді.
Жалпы алғанда Қазақстанда жоғары технологиялық кардиологиялық және кардиохирургиялық көмекті дамыту жүйелі түрде жалғасуда. 2025 жылдың қорытындысы бойынша елімізде жүрекке 13 106 ашық операция жасалды. Бұл 2024 жылмен салыстырғанда 7,2%-ға артық.
Хирургиялық араласулардың басым бөлігін аортокоронарлық шунттау операциялары – 46,1%, жүректің жүре пайда болған кемістіктеріне жасалған операциялар – 22,7%, жүректің туа біткен кемістіктеріне жасалған операциялар – 13,1% құрады.
Кардиохирургияның қарқынды дамуының нәтижесінде Қазақстан осы саладағы жетістіктері бойынша әлемнің үздік 30 елінің қатарына енді.
Бүгінде елімізде жүрекке ашық операция жасау, эндоваскулярлық араласулар және жоғары технологиялық медициналық көмектің басқа да түрлері сәтті орындалуда. Қазіргі таңда отандық кардиологияда жоғары технологиялық медициналық көмектің 80-нен астам түрі көрсетіледі.
Отандық медицинаның маңызды жетістіктерінің бірі – 2025 жылы жүректі трансплантаттаудың 100-ші операциясының сәтті жасалуы. Бұл қазақстандық мамандардың жоғары кәсіби даярлығын және трансплантология қызметінің дамуын айқын көрсетеді.
Соңғы бес жылдың ішінде оң үрдіс тұрақты сақталып келеді. Осы кезеңде қанайналым жүйесі ауруларымен сырқаттанушылық 15%-ға, ал осы аурулардан болатын өлім-жітім 35,1%-ға төмендеді.
2026 жылдың алғашқы бес айының қорытындысы бойынша да сырқаттанушылықтың төмендеу үрдісі жалғасуда:
- қанайналым жүйесі аурулары – 6,6%-ға;
* артериялық гипертензия – 9,7%-ға;
* жүректің ишемиялық ауруы – 10,1%-ға;
* жедел миокард инфаркті – 5,7%-ға;
* мидың қан айналымының жедел бұзылыстары (инсульттер) – 6,1%-ға төмендеді.
Қол жеткізілген нәтижелер инсульттік және кардиологиялық орталықтар желісін дамыту, жоғары технологиялық медициналық көмектің көлемін кеңейту, заманауи клиникалық хаттамаларды енгізу, жедел медициналық жәрдем қызметін жетілдіру, профилактикалық тексерулер ауқымын ұлғайту және жүрек-қантамыр ауруларына шалдыққан пациенттерді дәрілік қамтамасыз етудің қолжетімділігін арттырудың арқасында мүмкін болды.
Мемлекет басшысы Қасым-Жомарт Тоқаев денсаулық сақтау жүйесін дамыту мемлекеттің басты басымдықтарының бірі екенін үнемі айтып келеді. Президенттің айтуынша, соңғы жылдары елімізде медицина саласын жаңғырту бағытында ауқымды жұмыстар атқарылып, 2019 жылдан бері 1300-ге жуық денсаулық сақтау нысаны пайдалануға берілді. Соның нәтижесінде қазақстандықтардың орташа өмір сүру ұзақтығы 76 жасқа жуықтаған. Ең бастысы, азаматтарға сақтандыру мәртебесіне қарамастан базалық медициналық көмекке кепілдік беріліп, жоғары технологиялық емдеу түрлері қолжетімді бола түсті. Бұл жетістіктердің ішінде бала денсаулығын қорғауға бағытталған жұмыстардың орны ерекше. Өйткені, дені сау ұрпақ – елдің жарқын болашағының кепілі.
Атқарылған жұмыстардың нәтижесінде тұрғындарды алғашқы медициналық-санитариялық көмекпен қамту деңгейі едәуір жақсарып, ауылдық елді мекендерде медициналық қызметтің қолжетімділігі артты. Бұл өз кезегінде халық денсаулығын нығайтуға, аурулардың алдын алуға және тұрғындардың өмір сүру сапасын жақсартуға оң әсерін тигізуде.
Фото: Казинформ
