Ведомство Kizdar.net интернет-ресурсының серверлік инфрақұрылымын ұйымдастырушылар мен түпкілікті бенефициарлардың маусым айында ұсталғанын нақтылады.
«Ұйымдастырушылар қызметінің жолын кесу қоғамдық қауіпсіздікті қамтамасыз ету, азаматтардың өмірі мен денсаулығын қорғау, сондай-ақ адамгершілікті, заңдылық пен құқықтық тәртіпті нығайту үшін түбегейлі маңызға ие. Аталған сайт азаматтарды заңсыз қызметке тарту мақсатында интернет желісі арқылы жеңгетайлықты насихаттау және жарнамалау үшін пайдаланылғаны анықталды», деп хабарлайды ІІМ.
Платформада интимдік қызмет көрсету бойынша 9 мыңға жуық сауалнама орналастырылып, оның 500-ден астамы дәстүрлі емес жыныстық бағдардағы адамдар мен трансвеститтерге арналған болып шықты.
«Мұндай қызметтер жұқпалы аурулардың таралу қаупін туғызушы факторлардың бірі болып табылады», — деп атап өтті ІІМ.
Тергеу барысында ұйымдастырушылардың IT-компаниялардың бірінің негізін қалаушылар екендігі анықталды.
Олар әзірлеген Kizdar.net негізгі жобалардың бірі болып қана қоймай, олар кейіннен қызмет көрсету саласында басқа заңды IT өнімдер жасау кезінде енгізілген бағдарламалық шешімдерді әзірлеу және сынау үшін технологиялық платформа ретінде пайдаланылған.
«Компания Kizdar.net сайтының заңсыз қызметінен түсетін қаржы ағындары есебінен дамытылып отырған. Алдын ала есептеулер бойынша, олардың көлемі айына 500 миллион теңгеден асқан. Қаржылық операциялардың едәуір бөлігі ақша қаражаттарының қозғалысын бақылауды қиындату мақсатында криптовалюта құралдарын қолдану арқылы жүзеге асырылған» дейді ҚР ІІМ.
Жүргізілген тергеу шараларының нәтижесінде мыналар тәркіленді:
144 миллион теңге сомасында қолма қол ақша қаражаты
1,3 миллион АҚШ долларынан астам, оның ішінде 300 мың доллардан астам криптовалюта түрінде
оқ-дәрілері бар қару,
150 ге жуық компьютерлік және өзге де техника
автокөлік, құжаттар және қылмыстық іс бойынша басқа да дәлелдемелер.
«Сотқа дейінгі тергеу жалғасуда. Заңсыз қызметтің барлық мән-жайларын анықтауға, ықтимал қатысушыларды анықтауға, сондай-ақ заңсыз алынған кірістерді заңдастыру схемаларына бағытталған одан арғы тергеу және жедел іс-шаралар кешені жүргізілуде. Тергеу мүддесі үшін өзге де ақпараттар жария етуге жатпайды», — деп хабарлады ведомстводан.
Фото: Ulysmedia.kz
