Мемлекет басшысының тікелей қолдауымен түрлі бағдарламалар қабылданып, медициналық қызметтің қолжетімділігі, сапалы ем, алғашқы медициналық көмек мәселелеріне баса назар аударылды. Адамдарға ең маңыздысы – ауруынан құлан-таза айығып шығу. Мемлекет тарапынан жүзеге асырылып жатқан шаралардың нәтижелілігі де осы көрсеткішпен анықталса керек.
Жақында Түркістан қалалық орталық ауруханасында нейрохирургия саласында алғаш рет жоғары мамандандырылған күрделі операция сәтті орындалды. Науқасқа мойын омыртқасындағы жарықты жою мақсатында «Передний парафаренгеальный доступ слева, удаление грыжи диска на уровне С6–С7 позвонков, спондилодез межтеловым кейджем» атты ота жасалды.
Операция барысында дәрігерлер мойын омыртқасының С6–С7 деңгейіндегі диск жарығын алып тастап, омыртқааралық тұрақтылықты сақтау үшін арнайы кейдж орнатты. Хирургиялық ота сәтті өтіп, науқастың жағдайы тұрақтанды.
Аталған операция мойын омыртқасындағы жүйке қысылуын азайтып, ауырсыну мен қол-аяқтағы әлсіздік белгілерін жоюға мүмкіндік береді. Сонымен қатар, бұл — Түркістан медицинасының жоғары технологиялық нейрохирургиялық көмекті дамыту жолындағы маңызды жетістіктерінің бірі.
Бүгінде аурухана мамандары күрделі нейрохирургиялық оталарды заманауи медициналық технологиялар арқылы сәтті орындап, МӘМС тұрғындарға сапалы әрі тегін медициналық көмек көрсетуді жалғастыруда.
Жалпы алғанда қоғамның тұрақты дамуы мен ұлт болашағы азаматтардың денінің саулығына тікелей байланысты. Денсаулықты жүйелі түрде бақылау – аурудың алдын алуға, оны ерте анықтап, асқынуына жол бермеуге және ең бастысы – адам өмірін сақтауға мүмкіндік береді.
Осы орайда Кентау қалалық емханасының басшысы Ғани Бахтиярұлы және оның орынбасарлары және бөлім меңгерушілері емхана бөлімшелерін аралап, жұмыс барысымен танысты.
Аралау барысында медициналық көмектің сапасы, пациенттерге қызмет көрсету деңгейі, дәрігерлер мен мейіргерлердің қызметі, санитариялық-эпидемиологиялық талаптардың сақталуы және бөлімшелердің жалпы жұмыс тәртібі назарға алынды.
Сонымен қатар, қызметкерлермен кездесулер өткізіліп, күнделікті жұмыста кездесетін өзекті мәселелер талқыланды. Медициналық қызмет сапасын одан әрі жетілдіру, халыққа көрсетілетін көмектің қолжетімділігі мен тиімділігін арттыру бағытында нақты тапсырмалар берілді.
Кентау қалалық емханасы тұрғындарға сапалы, қауіпсіз және қолжетімді медициналық көмек көрсету жұмыстарын жүйелі түрде жалғастыруда.
Фото: Түркістан Денсаулық Сақтау Басқармасы
