Қатты тұрмыстық қалдықтар полигондарының 82 пайызы экологиялық және санитарлық нормаларға сәйкес келмейді. Бұл туралы Сенаттың жалпы отырысында депутат Әбдәлі Нұралиев айтты, деп хабарлайды ҚазАқпарат.
Сенатор қалалардағы ауаның жоғары деңгейде ластануы, қатты тұрмыстық қалдықтар полигондарының нашар жағдайы және жайылым жерлерінің тозуы мәселесіне назар аударды. «Қазіргі уақытта еліміздегі бар 3 мыңнан астам полигонда 125 млн тоннадан аса қатты тұрмыстық қалдықтар жиналған. Бұл полигондардың 82 пайызы экологиялық және санитарлық нормаларға сай келмейді. «Қазақстан Ғарыш Сапары» компаниясының ғарыштық мониторингі аясында елімізде жылдар бойы заңсыз қоқыс орындарының көбеюі анықталды, бірақ оларды жою шаралары толық шешімін таппай отыр», — деді Әбдәлі Нұралиев Үкімет басшысының атына жолдаған сауалында.
Сонымен қатар, ол мәселені көрсетіп қана қоймай, оларды шешудің ықтимал жолдарын айтты. Сенатор атап айтқанда мектептерге экологиялық тәрбиені қарқынды түрде енгізуді, ауаның тазалығына арналған арнайы заң жобасы мен тұрмыстық қалдықтарды қайта өңдеу және жою жөніндегі мемлекеттік бағдарлама әзірлеуді ұсынды.
