Бұл жоба сотталғандардың зияткерлік әлеуетін арттыруға, кітап оқуға деген қызығушылығын оятуға және босатылғаннан кейін қоғамға сәтті бейімделуіне жағдай жасауға бағытталған.
Негізгі мақсат – әрбір жасақтағы сотталғандарды толық қамтып, оларды тәрбиелік және профилактикалық іс-шараларға белсенді тарту.
Сонымен қатар, жоба аясындағы іс-шаралар Жамбыл облысы бойынша ҚАЖ департаментіне қарасты №59 мекемесінде де ұйымдастырылды. Мекемеде сотталғандарды кітап оқуға тарту, олардың бос уақытын тиімді ұйымдастыру және рухани дамуына жағдай жасау бағытында кешенді жұмыстар жүргізілуде.
«Шекарасыз оқу» жобасы – бұл тек оқу мәдениетін дамыту ғана емес, сонымен қатар тұлғаның рухани өсуіне ықпал ететін тиімді құрал. Кітап арқылы сотталғандар жаңа білім алып, өз ой-өрісін кеңейтіп, өмірге деген көзқарасын өзгерте алады.
Мамандардың айтуынша, мұндай бастамалар сотталғандардың қоғамға қайта оралу процесін жеңілдетіп, қайталама құқық бұзушылықтардың алдын алуға оң әсерін тигізеді. Осылайша, «Шекарасыз оқу» жобасы қылмыстық-атқару жүйесіндегі тәрбиелік жұмыстың маңызды элементіне айналып отыр.
