Күн тәртібіндегі мәселе бойынша аудандық экономика және қаржы бөлімінің басшысы Асқар Көлбай баяндама жасап, әр салаға қатысты межелерге жеке-жеке тоқталып, жоспардың орындалу барысын егжей-тегжейлі талдап өтті.
Аудан әкімі Қайрат Жолдыбайұлының көрсеткіштерді мұқият қарап шығып, жоспарды төмен орындаған мекеме басшыларын жеке-жеке тұрғызып, жауапты орынбасарлары және ауыл әкімдерімен бірлесіп жұмысты жандандыруды тапсырды.
Сондай-ақ, аудандық құрылыс, сәулет және қала құрылысы бөлімінің басшысы Мұрат Есінбек аудандағы заңсыз құрылыстарды анықтау, зерделеу жүргізу, жою жұмыстары туралы баяндады. Құжаттары толық алынбаған немесе дұрыс емес және өз мақсатына сай пайдаланбай жатқан заңсыз құрылыстарды анықтап, Түркістан облысының мемлекеттік сәулет-құрылыс бақылау басқармасына және Түркістан облысының жер ресурстарын басқару департаментіне өз құзыреті шегінде шара көру үшін жолданғанын атап өтті.
Мәжіліс соңында аудан басшысы ауылдық округ әкімдері мен жауапты бөлім басшыларына көрсеткіштерді толық орындауды қамтамасыз етіп, әр сала бойынша құзырлы органдармен бірлесіп жұмыс жүргізуді тапсырды.
Мемлекет басшысы Қасым-Жомарт Тоқаев «Жаңа жағдайдағы Қазақстан: іс-қимыл кезеңі» атты Қазақстан халқына арнаған Жолдауында «Цифрландыру – сәнге айналған үрдіске ілесу емес, ұлттың бәсекеге қабілеттілігін арттырудың негізгі құралы» екенін айтып, ең алдымен, цифрлы теңсіздікті жойып, барлық азаматты интернетпен және сапалы байланыспен барынша қамтамасыз ету керектігін тапсырған-ды.
Ал, биыл Президент «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына арнаған Жолдауын әлеуметтің әлеуетін цифрлық технологияларды қолдану арқылы шешуге бағыттады.
Қазіргі таңда Түркістан облысының цифрландыру, мемлекеттік қызметтер көрсету және архивтер басқармасы және «Jusan Mobile» АҚ арасында жүргізілген жұмыстар нәтижесінде байланысы мүлдем жоқ елді мекендерге ғарыштық байланыс жүйесінің ресурстарын пайдалану көзделді.
Осы орайда Отырар ауданының Қостерек елді мекенінде «Қолжетімді интернет» ұлттық жобасы аясында қоғамдық Wi-Fi интернетін тарататын заманауи OneWeb спутниктік жүйе станциясы орнатылып, іске қосылды.
Іске қосылған жүйені Отырар ауданы әкімінің орынбасары Айдос Құлмаханов, «Jusan Mobile» АҚ-ның Түркістан облысы бойынша директоры Нұрбол Баураевтар таныстырып, технологияның мүмкіндіктеріне тоқталды.
«Jusan Mobile» АҚ-ның өкілі Түркістан облысы бойынша байланысы жоқ және мүлдем төмен Арыс қаласының Бұлақ, Ақтас, Дарбаза және Қазығұрт ауданының Өгем, Келес ауданының Тартоғай, Түлкібас ауданының Иірсу, Шардара ауданының Құйған, Отырар ауданының Қостерек ауылдарында заманауи OneWeb спутниктік жүйесін орнатып, қоғамдық Wi-Fi интернеті жергілікті тұрғындардың қолдануына берілгенін жеткізді. Ал, аудан әкімінің орынбасары аудандағы байланысы төмен ауылдарды кең жолақты интернетке қолжеткізу бағытындағы жұмыстарға тоқталды.
Облыстық әкімдік және оператор арасында атқарылған жұмыстарға ауыл тұрғыны Сындарқұл Арғынбай өз пікірін білдіріп, ігі істің басында жүрген азаматтарға алғысын білдірді.
Айта кетсек, қараша айында базалық байланыс станциясы іске қосылмақ. Аталған байланыс станциясы арқылы ауыл тұрғындары толық қолжетімді байланыспен қамтылатын болады.
Тағы бір айтары Отырар ауданының әкімі Қайрат Жолдыбайұлы жұмыс сапарымен Шәуілдір, М.Шойманов ауылдарында болып, әлеуметтік нысандардың жай-күйімен танысты.
Алдымен аудан басшысы Шәуілдір ауылындағы Ұ.Арғынбеков көшесі бойына салынған балалар ойын алаңшасын аралап, ондағы инфрақұрылымдық жағдайды көрді. Жаңа алаңша ауыл балаларының бос уақытын тиімді өткізуіне, салауатты өмір салтын ұстануына ықпал етуге бағытталған.
Одан кейін аудан әкімі М.Шойманов ауылына ат басын бұрып, ауыл орталығына орнатылған балалар ойын алаңшасының мүмкіндіктерін бағамдады. Тұрғындардың сұранысына сәйкес салынған нысанның сапасына қатысты жауаптыларға тапсырма беріп, жұмыстардың орындалуы басты назарда болатынын жеткізді.
Сапар барысында әкім Шәуілдір ауылындағы тұқымбақ жұмысымен де танысты. Мұнда жеміс-жидек пен ағаш көшеттерін көбейту, ауыл аумағын көгалдандыру ісі қолға алынған. Аудан басшысы бұл бағыттағы еңбектің ауыл экологиясына, көркейту жұмыстарына берер пайдасын ерекше атап өтті.
Фото: Отырар ауданы әкімдігі
