Түркістан қаласының әуежайынан алғашқы тұрақты рейс іске қосылған сәттен бастап (2020 жылғы 1 желтоқсан) 160-тан астам рейс орындалып, 47 мыңға жуық жолаушы тасымалданды. Рейстердің орташа коммерциялық жүктемесі 83%-ды құрады. Бұл туралы Азаматтық авиация комитеті хабарлайды.
Азаматтық авиация комитетінің хабарлауынша, бүгінгі таңда Түркістан әуежайынан Нұр-Сұлтан, Алматы, Атырау және Ыстанбұлға рейстер орындалуда. Осы жылдың 2-ші жартыжылдығынан бастап Түркістанды аптасына 50 рейс жиілігімен 10 облыс орталығымен (Ақтау, Ақтөбе, Қарағанды, Көкшетау, Қостанай, Павлодар, Петропавл, Талдықорған, Өскемен) қосу жоспарлануда.
Түркістан қаласының әуежайы шетелдік әуе компаниялардың ұшуы үшін «ашық аспан» режиміне енгізілген, бұл оны ұшу географиясын кеңейту үшін тартымды етеді және шетелдік туристер ағынын тартуға ықпал етеді. Сондай-ақ, ағымдағы жылдың 31 мамырынан бастап «Fly Arystan» әуе компаниясы Түркістаннан Бішкекке (Қырғызстан) жаңа рейстерді іске қосуды жоспарлап отыр.
Сонымен қатар, Ташкентке (Өзбекстан) рейстің ашылуы қарастырылуда. Рейстер санитарлық – эпидемиологиялық талаптарды қатаң сақтай отырып және әуе компания сайтында жарияланған кестеге сәйкес ұшырылады. Еске салсақ, бұған дейін Түркістан әуежайынан орындалатын халықаралық рейстер саны артқаны туралы хабарлаған болатынбыз.
