Сенатор Әли Бектаев өзінің депутаттық сауалында осы саланың проблемаларын көтерді. Ол тәуелсіздік алғаннан бері аграрлық ғылым бірнеше рет реформаланғанын, бірақ маңызды жетістіктерге жете алмағанын атап өтті. Ғылыми-зерттеу институттары мен тәжірибелі шаруашылықтардың саны екі есе азайды, ал ғылыми қызметкерлер саны жеті есеге қысқарды. Сонымен қатар, Ұлттық аграрлық ғылыми-білім беру орталығы осы уақытқа дейін толыққанды агротехнологиялық хабқа айналған жоқ. Депутаттың пікірінше, қаржыландырудың қолданыстағы тетіктері салаға елеулі серпіліс бермейді.
«Бүгінде бізде ғылымды дамыту мақсатында бағдарламалық-нысаналы және конкурстық қаржыландыру тетіктері жұмыс істейді. Алайда бұл тәсіл ғылым саласында қарқынды серпіліс жасауға жеткіліксіз. Осыған байланысты конкурсқа тәуелсіз қаржыландырудың тұрақты тетіктерін енгізу маңызды. Агроөнеркәсіп кешенінде стратегиялық ғылыми жобаларды іске асыру үшін бес жыл мерзімге арналған тікелей конкурстан тыс қаржыландыру жүйесін енгізу орынды болар еді», — деді Әли Бектаев.
Сонымен қатар, сенатор «Қазақ ұлттық аграрлық зерттеу университетін дамытудың 2025-2029 жылдарға арналған бағдарламасы» әзірленгенін атап өтті. Оның аясында университет құрамына төрт ғылыми-зерттеу институты мен бір тәжірибе шаруашылығы берілді. Бағдарламаны іске асыру ғылыми-техникалық қызметті жоғары біліммен біріктіруге, зияткерлік әлеуетті дамытуға, инфрақұрылым мен зертханаларды жаңғыртуға, цифрлық шешімдерді енгізуге және ғылыми нәтижелерді коммерцияландыруға мүмкіндік береді. Алайда университеттің материалдық базасы ескірген, бұл сапалы зерттеулер жүргізуге және инновацияларды енгізуге кедергі келтіреді.
Фото: Tengrinews
