Бұл туралы Түлкібас ауданының әкімі Асқар Естібаевтың төрағалығымен өткен кезекті апталық жиында аудандық кәсіпкерлік бөлімінің басшысы Бекайдар Құрманалиев баяндады. Сонымен қатар, кәсіпкерлік саласына жауапты бөлім басшысы аудан әкімінің аймақта шағын және орта бизнесті дамыту бойынша берген тапсырмасына сәйкес, елді мекендер шегінен шағын өндірістік парктерді ашу бойынша атқарылып жатқан жұмыстарды баяндап өтті.
Қазіргі таңда Майлыкент, Т.Рысқұлов, Балықты, Жаскешу, Тастұмсық ауылдық округтерінен шағын өндірістік аймақ ашу бойынша жер телімдері қаралып, онда кәсіпкерлік нысан соғуға қызығушылық білдіріп отырған инвесторлар анықталып отыр. Кәсіпкерлікті дамытуды жүйелі жолға қоюды тапсырған аудан басшысы тың жобаларды дайындап, кәсіпкерлерге мемлекеттік қолдаулар көрсету бойынша сүйемелдеу жұмыстарын күшейтуді тапсырды.
Сондай-ақ, Түркістан облысында өңір басшысы Нұралхан Көшеровтің тапсырмасына сәйкес, инвестиция тарту, өндіріс орындарын ашу бағытында жұмыстар жүріп жатыр. Соның ішінде ауыл шаруашылығы өнімдерін өңдеу және кәсіпкерлік саласы бойынша Отырар ауданы айрықша қарқынмен дамып келеді.
Аудандағы ірі жобалардың бірі – «Eliko Snacks» ЖШС-нің сублимациялық кептірілген жеміс өндіру жобасы. Бұл кәсіпорын ауыл шаруашылығы өнімдерін терең өңдеуге, сондай-ақ ауданнан шығатын өнімдердің экспорттық әлеуетін арттыруға бағытталған. Жоба аясында 5 адам тұрақты жұмыспен қамтылып, тәулігіне 100 кг өнім өңдеу жоспарланып отыр.
Сонымен қатар Ақтөбе ауыл округіндегі «Мұрат» шаруа қожалығының 5000 бас малға арналған бордақылау алаңының құрылысы басталды. 100 гектар аумақты құрайтын кәсіпорын іске қосылғанда аудан тұрғындары үшін жаңа жұмыс орындары ашылып, ет өндірісінің көлемі артады деп күтілуде.
Отырар ауданының әкімі Қайрат Жолдыбайұлы аудандағы бірқатар нысандарды аралап, кәсіпорын иелерімен кездесіп, жобаның тиімділігі мен маңыздылығына тоқталды. Ол кәсіпкерлердің бастамаларына қолдау көрсетілетінін атап өтіп, ауыл шаруашылығы мен өңдеу саласындағы осындай жобалардың аудан экономикасына серпін беретінін жеткізді.
Ал, Түркістан қаласының әкімі Әзімбек Пазылбекұлы Түркия Республикасының «Sensemi» компаниясының өкілдерімен кездесіп, келіссөз жүргізді. Кездесу барысында Түркістан қаласында заманауи газ, электр және су өлшеуіш құрылғыларын өндіру жобасын іске асыру мәселелері талқыланды. Тараптар өзара пікір алмасып, жобаның негізгі бағыттарына тоқталды. Әзімбек Пазылбекұлы шетелдік инвесторларға Түркістан қаласының инвестициялық мүмкіндіктері мен туристік әлеуетін таныстырып, барлық қолайлы жағдай жасалғанын және инвесторларға жан-жақты қолдау көрсетілетінін атап өтті.
Инвесторлардың мәліметінше, жобаның құны бірінші кезеңде 5 млн АҚШ долларын, екінші кезеңде 10 млн АҚШ долларын құрайды. Жоба толық жүзеге асқан жағдайда шамамен 450 жаңа жұмыс орны ашылады деп күтілуде. Өндіріс орны Түркістан қаласының арнайы экономикалық аймағында орналаспақ.
Кездесу соңында тараптар өзара ынтымақтастықты нығайтып, жобаны сәтті жүзеге асыру үшін барлық қажетті қолдауды көрсетуге дайын екендерін білдірді.
Тағы бір айтары, Келес ауданының әкімі Жәнібек Ағыбаев өңір шаруаларымен кездесіп, қожалықтардың тыныс-тіршілігімен танысты.
Алдымен Жәнібек Есенұлы 1-Мамыр ауылындағы Бақытжан Абдиевтің жылыжайына барды. 2023 жылы іске қосылған нысан 0,15 гектар аумақта орналасқан. Онда жыл сайын 13 тонна қызанақ пен қияр өндіріліп, 2,5–3 млн теңге таза пайда түседі. Сондай-ақ, аудан басшысы ауылдағы Құдияр Рысбаевтың жылыжайымен танысты. 0,15 гектар аумақта орналасқан жылыжайда жылына 14 тонна қызанақ пен қияр өндіріледі. Жоба құны – 16 млн теңге.
Одан кейін аудан әкімі Бесқұбыр ауылындағы Шолпанай Ахмедқұлованың жылыжайында болды. 0,20 гектар аумақта орналасқан шаруашылықтан жылына 20 тонна өнім алынады. Жоба құны – 12 млн теңге, оның 8 млн теңгесі несие қаражаты. Орташа пайдасы – 6 млн теңге.
Фото: Егемен Қазақстан
