Қазіргі таңда, жеке инвесторлар есебінен Сарыағаш қаласының аумағында 3 қабатты 7 тұрғын үйдің құрылысы жүргізілуде. Әр тұрғын үйде 24 пәтерден орналастырылады. Жалпы саны – 168 пәтер, оның ішінде:
- 1 бөлмелі – 42 пәтер (әрқайсысы 40 м²),
- 2 бөлмелі – 84 пәтер (әрқайсысы 56 м²),
- 3 бөлмелі – 42 пәтер (әрқайсысы 71 м²).
Сонымен қатар, аудан әкімі Арман Абдуллаев Сарыағаш қаласындағы Самал-3 шағын ауданында пайдалануға берілген тұрғын үйлердің аумағын абаттандыру, атап айтқанда, тас төсеу жұмыстарының барысын арнайы барып пысықтады.
Аталған жұмыстарды «Сарыағаш қызмет» КММ тарапынан ұйымдастырылып, жалпы ұзындығы 3,5 шақырым аумаққа тас төсеу жұмыстары жүргізілді.
Айта кетсек, Сарыағаш ауданында 2025 жылдың қаңтар-шілде айлары аралығында Сарыағаш ауданында тұрғын үйді пайдалануға беру көрсеткіші 33 343 шаршы метрді құрауы тиіс болса, нақты 37 955 шаршы метр тұрғын үй пайдалануға беріліп, жоспар 120,6 пайызға орындалды. Бұл көрсеткіш өткен жылдың сәйкес кезеңімен салыстырғанда айтарлықтай өсімге қол жеткізілгенін көрсетеді. Аталған жұмыстар «Тұрғын үй-коммуналдық инфрақұрылымды дамыту 2023–2029 жылдарға арналған тұжырымдамасы» аясында жүзеге асырылуда.
Сондай-ақ, Сарыағаш ауданының әкімі Арман Абдуллаев Сарыағаш қаласына қарасты Самал-3 шағын ауданын ауыз сумен қамту мақсатында жүргізіліп жатқан құрылыс жұмыстарының барысын бақылап, жауапты басшыларға нақты тапсырмалар жүктеді. Аудан басшысы ауыз су жүйесінің сапалы әрі мерзімінде аяқталуы қажет екенін ескертті.
Сарыағаш қаласына қарасты Самал-3 шағын ауданын ауыз сумен қамту мақсатында құрылыс жұмыстары 2025 жылдың тамыз айында басталған. Бүгінде, ауыз су құбырларын тарту жұмыстары қарқынды түрде жүргізілуде. Тапсырыс беруші — ауданының тұрғын үй-коммуналдық шаруашылық бөлімі, жауапты мердігер — «Сарыагаш-Аман» ЖШС.
Сарыағаш ауданының әкімі Арман Абдуллаев Жемісті ауылдық округіне арнайы барып, елді мекенде атқарылып жатқан жұмыстардың барысын бақылады. Аудан басшысы сапа мен мерзім талаптарын сақтау қажеттігін атап өтіп, жауапты мердігер және ауылдық округ әкіміне нақты тапсырмалар жүктеді.
Тағы бір жағымды жаңалық, Жемісті ауылдық округіне қарасты Тың елді мекенінде шағын стадион мен балалар ойын алаңшасын салу мақсатында тиісті жобалық-сметалық құжаттама әзірленіп, мердігер мекеме ретінде “Dara 2025” ЖШС анықталған болатын. Бүгінде, аталған нысандардың құрылыс жұмыстары жүргізілуде.
Аталған жоба ауыл тұрғындарының спортпен шұғылданып, балалардың бос уақытын тиімді өткізуіне мүмкіндік беріп, елді мекеннің әлеуметтік инфрақұрылымын жақсартуға септігін тигізеді.
Сондай-ақ, Сарыағаш ауданының әкімі Арман Абдуллаев аудан аумағындағы егістік жерлерді ағын сумен қамтамасыз ету бағытында атқарылып жатқан жұмыстармен танысты. Құрылыс жұмыстарының барысын бақылаған аудан әкімі мердігер мекеме мен тиісті бөлім басшыларына жұмыстың сапасына және уақытында аяқталуына қатысты нақты тапсырмалар беріп, жобаның қатаң бақылауда болатындығын атап өтті.
Ауданға қарасты Қызылжар ауылдық округі аумағындағы егістік алқапты толыққанды ағын сумен қамту мақсатында «Фронтовой» қашыртқысынан коммуналдық меншіктегі «47-тармақ» каналына қосымша су беру жұмыстары қолға алынған. Жоба аясында ұзындығы 1000 метр, диаметрі 300 мм болатын құбыр тартылып, насос арқылы су беру жүйесін іске қосу жоспарланған. Аталған жұмыстарға аудандық бюджет есебінен қаржы бөлініп, «Kazakh Teh Stroy» ЖШС мердігер мекемесі құрылыс жұмыстарын жүргізуде.
Қазіргі таңда, 1 шақырым құбыр тартылып 1,5 шақырым электр желісі жүргізілген. Сонымен қатар, трансформатор қондырғысы орнатылған. Жоба бойынша қарастырылған су сорғы қондырғысы шет елден жеткізілді.
Фото: GOV.KZ
