Астана қаласындағы «Жансая» әлеуметтік қызмет көрсету орталығында 640 бала ем алады, оның 63-і кәмелет жасына жеткендер. Ерекше балаларға ерекше жағдай жасауы тиіс орталықтағы 160 қызметкердің орташа жалақысы 180 мың теңге. Жұмыстың көбінесе жоғары эмоционалды және физикалық күш-жігерді қажет ететінін ескерсек бұл өте аз ақша. Салдарынан ешкім мұндай орталыққа қызметке келгісі келмейді, кадр тапшы. 2024 жылы 53 қызметкер жұмыстан кетсе, 2025 жылдың жарты жылдығында 28 қызметкер қызметтен кеткен. Еліміздегі барлық әлеуметтік қызмет көрсету орталықтарындағы жағдай дәл осындай.
«Бас қаладағы «Шарапат» әлеуметтік қызмет көрсету орталығына да бас сұқтым, жұмыскерлердің жағдайы адам аярлықтай. Бір орталыққа 900 ата-әже қаралады. Ішінде бала-шағасы тастап кеткен ата-әжелер де бар, оларды көргенде жүрегің қан жылайды. Қамкөңіл қариялардың жағдайын жасайтын әлеуметтік қызметкерлердің жалақысы 110 мың теңге. Салдарынан ол жаққа ешкім жұмысқа бармайды» дейді депутат өз сауалында.
Сондықтан Н. Сәрсенғалиев Үкіметтің 1193 бұйрығын өзгертіп “Күтім жөніндегі әлеуметтік қызметкерлердің, әлеуметтік жұмыс жөніндегі консультанттардың, орта медицина қызметкерлерінің (ЕДШ нұсқаушысы, массажист) (жалпы әлеуметтік қорғау жүйесі қызметкерлерінің) жалақысын көтеру керек деген ұсыныс жолдады. Денсаулық сақтау және әлеуметтік салада қызмет ететін педагогтарды білім беру жүйесіндегі педагогтармен теңестіру керек.
«Аспаннан киіз жауса да, кедейге ұлтарақ бұйырмайды» дейді қазақ. Оның айғағын алыстан іздеп керек емес. Жазда жұртпен жүздестік, қамкөңіл қарапайым қарашаны көрдік, айлығын шайлығына жеткізе алмай жанталасқан ұл-қыздармен ұшырастық. «Түйені жел шайқаса ешкіні көктен ізде» демекші, алысқа бармай Астанадағы ахуалды айтайын, өңірдегі өмір содан-ақ түсінікті болар. Елдегі әлеуметтік қызметкерлердің жағдайы жанға батып барады. Үкіметтің өмірі өзгермейтін 1193 деген бұйрығы бұқараның базынасын бұйым құрлы көрмей тұр. Ағайынның айлығын өсіру үшін 1193 деген бұйрықты өшіру керек, бірақ оған Үкімет үкім етер емес» дейді Мәжіліс депутаты премьер-министрдің орынбасары Ермек Көшербаевқа жолдаған сауалында.
Фото: Azattyq-ruhy.kz
