Жиын аясында Ұшқын, Жүзімдік және Қошқарата ауылдық округтері әкімдерінің атқарған жұмыстары туралы есептері тыңдалып, олардың қызметінің тиімділігі бағаланды. Мәслихат депутаттары мемлекеттік кірістер басқармасының аудан бюджетінің кіріс бөлігін қалыптастыру бағытындағы жұмыстары бойынша баяндамасын тыңдады.
Сессия барысында ауылдық елді мекендерге жұмыс істеуге және тұруға келген денсаулық сақтау, білім беру, әлеуметтік қамсыздандыру, мәдениет, спорт және агроөнеркәсіптік кешен салаларының мамандарына, сондай-ақ ауыл және ауылдық округтер әкімдері аппараттарының мемлекеттік қызметшілеріне биылғы жылы көтерме жәрдемақы төлеу және тұрғын үй сатып алу немесе салу үшін бюджеттік несие беру мәселелері де назардан тыс қалмады.
Сонымен қатар, кейбір елді мекендердің жер-шаруашылық орналастыру жобаларын бекіту бойынша ұсыныстар қаралды.
Бүгінде Келес ауданында екі білім ошағы – №1 О.Есімов атындағы және №4 Ж.Баласағұн атындағы мектептер реновация жобасы аясында кешенді жөндеуден өтуде. Бұл жұмыстар оқу ордаларының материалдық-техникалық базасын жаңарту, оқушылар мен мұғалімдерге қолайлы әрі қауіпсіз орта қалыптастыру мақсатында жүзеге асырылып отыр.
Жөндеу жұмыстары аясында мектептердің ішкі және сыртқы инженерлік желілері толықтай жаңартылуда. Келес ауданының әкімі Жәнібек Ағыбаев нысанды аралау барысында құрылыс жұмыстарының сапасына, қолданылып жатқан құрылыс материалдарының стандарттарға сәйкестігіне, техникалық қадағалаудың дұрыс жүргізілуіне және белгіленген мерзімдерге сай аяқталуына ерекше назар аударды. Өйткені бюджет қаржысы өз мақсатына жұмсалып, жұмыс сапалы атқарылуы тиіс.
Жоспар бойынша, барлық жөндеу жұмыстары 2025 жылдың жаңа оқу жылы басталғанға дейін толық аяқталып, мектептер оқушылар мен мұғалімдердің игілігіне пайдалануға берілмек.
Сондай-ақ Жүзімдік ауылдық округіне қарасты Ақсу және Оңтүстік елді мекендерінде ауыз су жүйесінің құрылысы жүргізілуде. Бұл құрылыс жұмыстары арнайы мемлекеттік қор есебінен қаржыландырылып, аудандық прокуратураның тұрақты бақылауында тұр. Жоспарға сәйкес, Оңтүстік елді мекеніндегі ауыз су жүйесінің құрылысын биылғы жылдың III тоқсанында аяқтау көзделсе, Ақсу елді мекені тұрғындарына таза ауыз су жеткізу жүйесі жыл соңына дейін пайдалануға беріледі.
Айта кетейік, бүгінгі таңда аудан бойынша барлығы 83 елді мекеннің 64-і немесе 88,4 пайызы орталықтандырылған ауыз сумен қамтылған. Қалған 15 елді мекенде атап айтқанда Ақжол, Қауыншы Оңтүстік, Ғ.Мұратбаев, Қаратөбе, Қосөткел, Жуантөбе, Жаңадәуір, Кеңдала, Ескіқорған, Құйған, Қияжол, Көгерту, Ақжар, Ақсу елді мекендерінде құрылыс жұмыстары кезең-кезеңімен жүргізілуде.
Бүгінде ауданда 8 мәдениет үйі мен 11 клуб тұрғындарға мәдени қызмет көрсетіп келеді. Бұл нысандар ауыл халқына рухани демалыс пен өнерді тамашалау мүмкіндігін ұсынуда. Өткен жылы Ошақты ауылдық округіне қарасты Жиделі елді мекенінде 75 орындық жаңа мәдениет үйі салынып, пайдалануға берілді. Бұл – аудан мәдениеті үшін маңызды оқиғалардың бірі болды. Қазіргі таңда тағы 4 елді мекенде жаңа мәдени нысандардың жобалық-сметалық құжаттамасы әзірленіп, қаржыландыруға ұсынылды. Жүзімдік ауылдық округінде жаңа мәдениет үйінің құрылысы басталып, қарқынды жүргізілуде.
Сондай-ақ, Алпамыс батыр, Біртілек және Ұшқын ауылдық округтерінде мәдениет үйлерін салу бағытында дайындық жұмыстары жалғасуда. Бұл жобалар жүзеге асқанда, ауыл тұрғындарының мәдени өмірі жаңа деңгейге көтерілмек.
Келес ауданында қайтарылған активтер есебінен 13 елді мекен ауызсумен қамтылады. Атап айтқанда, 5 млрд теңгеге жуық қаражатқа Жүзімдік, Бірлік және Ақтөбе ауылдық округтеріндегі 13 елді мекен таза ауыз сумен қамтылады.
Қазір мердігер мекемелер анықталып, ұңғыма қазу мен құбырлар тарту жұмыстары басталып кетті. Жобалар аяқталған соң 13 мыңнан аса халық тұрақты түрде тіршілік нәрін тұтына алады.
Фото: Келес Ауданы Әкімдігі
