Биыл Түркістан облысы Жетісай ауданында өз кәсібін бастаймын, адал еңбек етемін деушілерге берілетін мемлекеттік қайтарымсыз гранттардың бірінші легі бойынша ауданға берілген 75 орынға 150 азамат құжат тапсырған. Яғни, мемлекет қолдауына ынта білдірушілер қатары көп деген сөз. Жетісай ауданының әкімі Серік Үсенұлы Мамытов бизнес жобаларды қаржыландыруда қатаң бақылау жүргізілетіні және мемлекет қаржысының әр тиынының есебі сұралатынын нақты айтты.
Ал Мақтаарал ауданы кезекті аппарат мәжілісінде бірқатар өзекті мәселелері қаралды. Соның ішінде аудан бюджетінің игерілу деңгейі, бюджет қаражатын ұтымды және есепті пайдалану барысы да кеңінен талқыланды.
Аудандық қаржы бөлімінің басшысы аудан бюджетінің орындалу көрсеткіштері бойынша баяндама жасап, жыл басынан бері орын алған кейбір кемшіліктер, жоспарды толық әрі тиімді игеру бағытында кездесіп жатқан кедергілер туралы баяндады.
Жиын барысында Мақтаарал ауданы әкімінің міндетін атқарушы Нұрбол Саттаров хаттамалық тапсырмалардың орындалуына салғырт қараған ауыл әкімдерін ерекше атап, олардың әрқайсысынан жеке-жеке жауап алды. Кейбір әкімдерге қатысты тәртіптік шара қолдану туралы тапсырма беріп, бұл туралы арнайы хаттамаға енгізуді жүктеді.
«Әрбір мемлекеттік қызметші халықтың сенімін ақтап, жүктелген міндетке аса жауапкершілікпен қарауы керек. Бастамалар мен тапсырмалар орындалу үшін емес, нақты нәтиже беруі тиіс. Тәртіп пен талап бар жерде даму болады» – деді, жиынды қорытындылаған Нұрбол Саттаров.
Сондай-ақ Созақ ауданы Жартытөбе ауылында бюджет қаражаты есебінен салынған бірқатар әлеуметтік нысандар пайдалануға берілді. Атап айтқанда, баскетбол алаңы, балалар ойын алаңшасы және «Street workout» спорттық жаттығу алаңы ел игілігіне ұсынылды.
Аталған нысандар өткен жылы облыс көлемінде өткізілген «Үлгілі ауыл» байқауы нәтижесінде Жартытөбе ауылының жүлделі орынға ие болуына байланысты облыстық бюджет есебінен салынды. Бұл бастама ауылдың әлеуметтік инфрақұрылымын жақсартып, тұрғындар үшін қолайлы орта қалыптастыруға бағытталған.
Ашылу салтанатына арнайы қатысқан аудан әкімі Мұхит Тұрысбеков ауыл тұрғындарын мерекемен және жаңа нысандардың іске қосылуымен құттықтады. Сондай-ақ ауданда спортты дамыту бағытында атқарылып жатқан жұмыстар мен алдағы жоспарлар жөнінде кеңінен айтып өтті.
Шара барысында ардагер ұстаз, ауданның Құрметті азаматы Әшімхан Тәпі сөз сөйлеп, ел игілігі жолындағы бастамаларға ұйытқы болған азаматтарға алғысын білдірсе, ауыл қариясы Балтабай Аймұрзаев ақ батасын беріп, сәттілік тіледі.
Жаңа нысандар балалардың бос уақытын тиімді өткізуіне, ауыл жастарының салауатты өмір салтын ұстануына зор мүмкіндік берері сөзсіз.
Қалай айтсақ та ел тұрғындарының сапалы өмір сүру деңгейін қамтамасыз ету үшін мемлекеттік бюджет қаражатын тиімді және мақсатты пайдалану өте маңызды.
Фото: Атырау газеті
