Ұлттық тестілеу орталығының басшысы Дидар Смағұлов ҰБТ-ға қандай сұрақтар қосылғанын айтты. Бұл туралы ол өзінің Facebook парақшасында хабарлаған.
Смағұлов ең алдымен Абылай ханның атының тісі туралы сұрақтарға қатысты пікір білдірді. Айтуынша, ҰБТ-да мұндай сұрақ ешқашан болмаған. «Кейбір ата-аналар осындай тапсырманы емтиханға дайындап жатқан шағын жеке орталықтың байқау сынақтарынан көріп, бұл сұрақты ҰБТ базасымен байланыстыра бастады. Содан соң оны бұқаралық ақпарат құралдары бірден іліп алды да (сәлем фактчекинг) мүлде басқа ой қалыптасып шыға келді, оны тіпті әлі күнге дейін беделді сарапшылар қолданып жүр. Бірақ, мұндай сұрақтар ҰБТ-да болуы мүмкін емес: ең тәжірибелі педагогтер құрастырған әр тапсырма 2 тәуелсіз сараптамадан өтеді», — дейді ол.
Смағұловтың сөзінше, тест тапсырмалары базаға қабылданар алдында тағы бір мәрте тексеруден өтеді. «Бірқатар уақыттан бері 120 000 тест тапсырмасының әрқайсысының артында тұрған, сапасына жауапты нақты адамдардың аты-жөндері бар. Министрдің тапсырмасымен тәжірибесі, жетістіктері мен кәсібилігі тұрғысынан әзірлеушілерге қойылатын талаптар күшейтілді, әр тест тапсырмасының сапасы бойынша келісімшартта қосымша жауапкершілік енгізіліп, жосықсыз әзірлеушілердің тізімі (қара тізімге) құрастырылды, яғни ол тізімге кіру — ҰТО жұмысына қатысудың кез келген мүмкіндігін жояды», — дейді ол.
Айта кетсек, 2018 жылы апелляция қорытындысы бойынша 101 тест тапсырмасы қате деп танылса, 2019 жылы – 58, 2020 жылы мұндай 27 тест кездеседі. Ал 2021 жылдың наурызындағы ҰБТ қорытындысы бойынша апелляцияда тек 21 тест тапсырмасы қанағаттандырылды.
Дидар Смағұловтың сөзінше, жыл сайын есте сақтау қабілетін жаттықтыруға бағытталған тапсырмалар азайып жатыр. Оның орнына алған білімді іс жүзінде қолдануға бағытталған тапсырмалар көбейеді.
Сонымен бірге биыл тестің басты жаңалығы – Қазақстан тарихы мен Дүниежүзі тарихы бойынша нақты даталардың жариялануы болып отыр. Биыл әр тест тапсырушыға датаға байланысты 2-3 сұрақ келеді.
